نئی دہلی:جے این یو میں طلباء کے دو گروپوں میں پرتشدد تصادم میں طلبہ یونین صدر سمیت کئی طالب علم زخمی ہو گئے ہیں۔اس معاملے میں اب سیاسی جماعتوں کا رد عمل بھی سامنے آنے لگا ہے۔ عام آدمی پارٹی کے لیڈر اور راجیہ سبھا ممبر پارلیمنٹ سنجے سنگھ نے جے این یو تشدد کو لے کر مرکزی وزیر داخلہ پر براہ راست حملہ بولا ہے۔

انہوں نے کہا کہ جب سے امت شاہ ملک کے وزیر داخلہ بنے ہیں، اس کے بعد سے ملک کی راجدھانی دہلی غنڈہ گردی ، تشدد اور جرائم کا اڈہ بن گئی ہے۔ کبھی وکلا ء پر حملہ ہوتا ہے، تو کبھی طالب علموں پر حملہ کیا جاتا ہے۔وزیر داخلہ امت شاہ کو اپنے عہدے پر رہنے کا حق نہیں ہے۔امت شاہ کو استعفیٰ دینا چاہئے۔

 وہیںعام آدمی پارٹی کے لیڈر اور دہلی کے وزیر اعلیٰ اروند کیجریوال نے پولیس سے موقع پر پہنچ کر امن بحال کرنے کی اپیل کی ہے۔انہوں نے لیفٹیننٹ گورنر سے بھی بات کی ہے۔ساتھ ہی لیفٹیننٹ گورنر سے اپیل کی کہ وہ پولیس کو امن و امان بحال کرنے کا حکم دیں۔کیجریوال نے بتایا کہ لیفٹیننٹ گورنر نے یقین دہانی کرائی ہے کہ وہ حالات پر قریب سے نظر رکھ رہے ہیں اور ضروری قدم اٹھا رہے ہیں۔