دبئی: ایران نے اسرائیل کی خفیہ ایجنسی موساد کے لیے جاسوسی کرنے کے معاملے میں مجرم قرار دیے گئے ایک شخص کو قم شہر میں پھانسی دے دی۔ ملک کی سرکاری عدالتی خبر رساں ایجنسی "میزان" نے اتوار کو نشر ہونے والی خبر میں یہ معلومات فراہم کیں۔ خبر کے مطابق، سپریم کورٹ نے مجرم کی سزا برقرار رکھی اور اس کی طرف سے کی گئی معافی کی درخواست کو مسترد کر دیا، جس کے بعد ہفتہ علی الصبح اسے پھانسی دے دی گئی۔ خبر میں اس شخص کی شناخت ظاہر نہیں کی گئی ہے۔
البتہ، اس میں بتایا گیا ہے کہ اس پر "صیہونی حکومت کے ساتھ خفیہ تعاون کرنے" کا الزام تھا اور اسے "زمین پر فساد پھیلانے" اور "خدا کے خلاف دشمنی" کا مجرم قرار دیا گیا تھا۔ یہ ایسے جرائم ہیں جن کے لیے ایران کے اسلامی فوجداری قانون کے تحت سزائے موت کا حکم دیا جا سکتا ہے۔
خبر کے مطابق، متعلقہ شخص نے اکتوبر 2023 میں اسرائیل کی خفیہ سروسز کے ساتھ رابطہ اور تعاون شروع کیا اور چار ماہ بعد فروری 2024 میں اسے گرفتار کر لیا گیا۔ خبر میں کہا گیا ہے کہ متعلقہ شخص نے موساد کو حساس معلومات فراہم کیں اور اسرائیلی خفیہ ایجنسی کے اشارے پر ایران کے اندر مشن انجام دیے۔ خبر میں مبینہ جاسوسی کی نوعیت یا شخص کی گرفتاری کی تاریخ کے بارے میں کوئی معلومات نہیں دی گئی ہیں۔