نئی دہلی/جموں: ہندوستان اور پاکستان کشیدگی کے درمیان، پاکستانی فوج نے مغربی سرحد پر مسلسل فوجی سرگرمیاں تیز کر دی ہیں۔ کرنل صوفیہ قریشی نے پریس کانفرنس میں بتایا کہ پاکستان نے جنگی اصولوں کو نظر انداز کرتے ہوئے سویلین طیاروں کی آڑ میں فوجی طیارے چلائے اور جان بوجھ کر  ہندوستانی  سرحد میں طبی مراکز اور اسکول کیمپس کو نشانہ بنایا۔ ہندوستان  نے اسے بین الاقوامی انسانی قوانین کی سنگین خلاف ورزی قرار دیا ہے۔
مرکزی حکومت نے ایک خصوصی پریس کانفرنس میں بتایا کہ کل رات پاکستان نے ہندوستان کے کئی فوجی ٹھکانوں کو نشانہ بنایا۔ ان میں جموں و کشمیر اور پنجاب کے بڑے مراکز جیسے ادھم پور، پٹھانکوٹ اور بھٹنڈہ شامل ہیں۔

https://x.com/AHindinews/status/1921080295333523611
خارجہ سکریٹری وکرم مصری، آرمی کرنل صوفیہ قریشی اور فضائیہ  کی  ونگ کمانڈر ویومیکا سنگھ نے مشترکہ طور پر یہ جانکاری دی۔ سیکرٹری خارجہ کا کہنا تھا کہ پاک فوج کی یہ کارروائی اشتعال انگیزی کے زمرے میں آتی ہے، تاہم ہندوستان نے روک ٹوک اور متوازن جواب دیا۔ انہوں نے یہ بھی واضح کیا کہ ہندوستان  کسی بھی طرح کی کشیدگی نہیں چاہتا بشرطیکہ پاکستان بھی تحمل کا مظاہرہ کرے۔
حکومت کے مطابق پاکستان نے مغربی سرحد پر ڈرون اور بھاری ہتھیاروں کا استعمال کیا اور کل 26  قصبوں کو نشانہ بنایا۔ زیادہ تر حملوں کو ہندوستان  نے کامیابی سے ناکام بنا دیا۔ فوجی افسر کرنل قریشی نے کہا کہ پاکستان نے نہ صرف فوجی ٹھکانوں کو نشانہ بنایا بلکہ سری نگر، اونتی پورہ اور ادھم پور میں اسکولوں اور صحت کے مراکز پر بھی حملہ کیا۔
کرنل صوفیہ قریشی نے کہا کہ پاک فوج نے پوری مغربی سرحد پر عسکری سرگرمیاں تیز کر دی ہیں۔ دریں اثنا، جمعہ اور ہفتہ کی درمیانی شب، ہندوستان نے پاکستان کے بڑے ایئربیس پر جوابی کارروائی کی۔ ہفتے کی صبح، حکومت ہند نے ایک پریس کانفرنس کی اور باضابطہ طور پر تصدیق کی کہ فتح-1 میزائل حملے کے جواب میں، ہندوستانی  فضائیہ نے ایک درست اور فیصلہ کن حملہ کیا، جس سے پاکستان کے فوجی ڈھانچے کو بھاری نقصان پہنچا۔
صوفیہ قریشی نے بتایا کہ ہندوستان  نے پاکستان کی اشتعال انگیز کارروائی کا فوری اور موثر جواب دیا۔ ہندوستانی فضائیہ نے رفیقی، مرید، چکلالہ اور رحیم یار خان سمیت پاکستان کی اہم فوجی تنصیبات پر سرجیکل حملے کئے۔
انہوں نے کہا کہ ان جوابی کارروائیوں میں ہندوستان نے اس بات کا خاص خیال رکھا کہ شہریوں اور عمارتوں کو کم سے کم نقصان پہنچے۔ آپریشن کے دوران درست ہتھیاروں اور جدید جنگی طیاروں کا استعمال کیا گیا، صرف فوجی اڈوں کو نشانہ بنایا گیا۔

https://x.com/AHindinews/status/1921078808142377360
کرنل قریشی نے یہ بھی کہا کہ پاکستان نے بین الاقوامی ہوا بازی کے قوانین کی خلاف ورزی کرتے ہوئے اپنے فوجی طیارے سویلین ہوائی راستوں کی آڑ میں اڑائے جو کہ سنگین خلاف ورزی ہے۔
خارجہ سکریٹری وکرم مصری نے کہا کہ میں نے کئی مواقع پر کہا ہے کہ پاکستان کے اقدامات اشتعال انگیز اور کشیدگی کو بڑھاتے رہے ہیں۔ جواب میں، ہندوستان نے پاکستان کے ان اشتعال انگیز اور بڑھتے ہوئے اقدامات کا ذمہ دارانہ اور متوازن انداز میں جواب دیا ہے۔