انٹرنیشنل ڈیسک: یمن میں سعودی عرب کی حمایت یافتہ حکومت اور یو اے ای کی حمایت یافتہ علیحدگی پسند گروپوں کے درمیان بڑھتے ہوئے فوجی تصادم کا براہ راست اثر عام شہریوں پر پڑ رہا ہے۔ اسی بحران کے درمیان بھارت نے فوری قدم اٹھاتے ہوئے سوکوترا جزیرے پر پھنسے ایک بھارتی شہری کو بحفاظت وطن واپس پہنچایا ہے۔ یمن میں جاری تشدد اور سیاسی عدم استحکام کے دوران سوکوترا جزیرے پر گزشتہ چند ہفتوں سے پھنسے بھارتی شہری راکھی کشن گوپال کو بحفاظت نکال کر بھارت واپس لایا گیا ہے۔ یمن میں بھارتی مشن نے بتایا کہ انہیں 7 جنوری کو خصوصی یمنیہ پرواز کے ذریعے جدہ بھیجا گیا، جہاں سے وہ بھارت کے لیے روانہ ہوئیں۔
بھارتی مشن نے سوشل میڈیا پلیٹ فارم ایکس پر جانکاری دیتے ہوئے کہا کہ جدہ میں بھارت کے قونصل خانے کے افسران نے انہیں وصول کیا اور تمام رسمی کارروائیوں کے بعد انہیں بحفاظت وطن روانہ کیا گیا۔ یہ انخلا ایسے وقت میں ہوا ہے جب یمن میں سعودی عرب کی حمایت یافتہ سرکاری افواج اور یو اے ای کی حمایت یافتہ سدرن ٹرانزیشنل کونسل کے درمیان کشیدگی عروج پر ہے۔ حالیہ جھڑپوں میں حضرموت اور المہرہ صوبوں میں فوجی ٹھکانوں کو لے کر شدید تصادم ہوا، جس کے باعث فضائی خدمات متاثر ہو گئی ہیں۔
رپورٹس کے مطابق ایس ٹی سی فورسز نے حال ہی میں حضرموت کے دارالحکومت مکلا سمیت کئی علاقوں سے پیچھے ہٹنا شروع کر دیا ہے۔ تاہم تشدد کے باعث سوکوترا جزیرے پر تقریباً 400 غیر ملکی سیاح پھنسے ہوئے ہیں، کیونکہ سرزمین پر تصادم کی وجہ سے پروازیں معطل کر دی گئی ہیں۔ یمن حکومت کا کہنا ہے کہ وہ سعودی عرب کی مدد سے ریاست کا کنٹرول بحال کرنے کی کوشش کر رہی ہے، جبکہ ایس ٹی سی نے جنوبی یمن کو ایک آزاد ملک قرار دینے کی وارننگ دی ہے۔ اس ٹکراو¿ نے نہ صرف علاقائی سیاست کو پیچیدہ بنا دیا ہے بلکہ عام شہریوں اور غیر ملکی شہریوں کی آمد و رفت بھی بری طرح متاثر ہوئی ہے۔