انٹرنیشنل ڈیسک: ایران میں رہنے والے ہندوستانیوں کے لیے اتوار کو جاری کردہ ایک ایڈوائزری میں کہا گیا ہے کہ وہ گھبرائیں نہیں بلکہ محتاط رہیں اور اسرائیلی حملے کے بعد ملک میں پیدا ہونے والی صورتحال کے پیش نظر تہران میں ہندوستانی سفارت خانے سے رابطے میں رہیں۔ ہندوستانی سفارت خانے کی طرف سے جاری کردہ ایڈوائزری میں تمام ہندوستانی شہریوں اور ہندوستانی نژاد لوگوں سے چوکس رہنے ،  تمام غیر ضروری سرگرمیوں سے گریز کرنے ، سفارت خانے کے سوشل میڈیا اکاؤنٹس  پر نظر رکھنے  اور مقامی حکام کے مشورے کے مطابق حفاظتی پروٹوکول پر عمل کرنے کو کہا گیا ہے ۔
سفارت خانے نے اپنے 'X' اکاؤنٹ پر گوگل فارم دستیاب کرایا ہے اور ہندوستانی شہریوں سے کہا ہے کہ وہ اسے بھرکر  اپنی تفصیلات فراہم کریں۔ اس میں کہا گیا ہے کہ براہ کرم یاد رکھیں، گھبرانے کی ضرورت نہیں ہے، ہوشیار رہیں اور تہران میں ہندوستانی سفارت خانے سے رابطے میں رہیں۔ تہران میں ہندوستانی مشن نے ایک ٹیلی گرام لنک (TG) بھی فراہم کیا اور ہندوستانی شہریوں سے کہا کہ وہ مشن سے صورتحال کے بارے میں تازہ ترین معلومات حاصل کرنے کے لیے اس سے رابطہ کریں۔ سفارت خانے نے سوشل میڈیا پلیٹ فارم 'X' پر لکھا کہ براہ کرم دھیان دیں کہ یہ ٹیلی گرام لنک (TG) صرف ہندوستانی شہریوں کے لیے ہے جو فی الحال ایران میں ہیں۔
ہندوستانی سفارت خانے نے ہنگامی حالات کے لیے کچھ ہیلپ لائن (HL) نمبر بھی جاری کیے ہیں۔ اسرائیل نے جمعہ کی علی الصبح ایران پر حملہ کر کے اس کے جوہری، میزائل اور فوجی ڈھانچے کو نشانہ بنایا۔ بعد ازاں ایران نے اسرائیل کے خلاف جوابی حملے شروع کر دیے۔ اسرائیل نے مزید زوردار حملے کی دھمکی دی ہے۔ اسی دوران ایران کے کچھ میزائل اسرائیل کے فضائی دفاعی نظام میں گھس کر رہائشی عمارتوں پر گرے۔