نیشنل ڈیسک: ہندوستان نے آپریشن سندور کے بارے میں جھوٹا اور مفاد پرستانہ بیان پیش کرنے پر پاکستان کے سفیر کو سخت جواب دیتے ہوئے اقوام متحدہ کی سلامتی کونسل میں کہا کہ پاکستان کی جانب سے دہشت گردی کو سرکاری  پالیسی کے آلے کے طور پر مسلسل استعمال کیے جانے کو برداشت کرنامعمولی نہیں ہے۔ اقوام متحدہ میں ہندوستانی  کے مستقل نمائندے سفیر پروتھنینی ہریش نے اقوام متحدہ میں پاکستان کے سفیر عاصم افتخار احمد کے بیانات پر سخت ردعمل ظاہر کیا۔
 احمد نے بین الاقوامی قانون کی بالادستی کی توثیق، امن، انصاف اور کثیر الجہتی نظام کو بحال کرنے کے راستے کے موضوع پر پیر کو اقوام متحدہ کی سلامتی کونسل میں ہونے والی کھلی بحث میں آپریشن سندور، جموں و کشمیر اور سندھ طاس معاہدے پر تبصرہ کیا تھا۔ ہریش نے کہا کہ سلامتی کونسل کا منتخب رکن پاکستان یک نکاتی ایجنڈا رکھتا ہے، ہندوستان  اور اس کے عوام کو نقصان پہنچانا۔
احمد نے کونسل کو بتایا کہ آپریشن سندور پر پاکستان کے ردعمل نے یہ ثابت کیا ہے کہ دباؤ یا سزا سے بچا ؤ پر مبنی کوئی نئی معمول کی صورت حال نہیں ہو سکتی۔ ہندوستان  نے احمد کے بیانات پر پاکستان کو نشانہ بنایا اور ہریش نے زور دے کر کہا کہ پاکستان دہشت گردی کو معمول بنانا چاہتا ہے لیکن ایسا کبھی نہیں ہو سکتا۔ ہریش نے کہا کہ ہم نے پاکستان کے نمائندے سے نئی معمول کی صورت حال کی بات سنی۔ میں ایک بار پھر دوہراتا ہوں کہ دہشت گردی کو، جیسا کہ پاکستان چاہتا ہے، کبھی معمول نہیں بنایا جا سکتا۔ پاکستان کی جانب سے دہشت گردی کو سرکاری پالیسی کے آلے کے طور پر مسلسل استعمال کیے جانے کو برداشت کرنا معمول نہیں ہے۔
 انہوں نے کہا کہ ہندوستان اپنے شہریوں کی حفاظت یقینی بنانے کے لیے ہر ضروری قدم اٹھائے گا۔ ہریش نے کہا کہ یہ معزز ایوان پاکستان کے لیے دہشت گردی کو جائز قرار دینے کا پلیٹ فارم نہیں بن سکتا۔ انہوں نے کہا کہ پاکستان کے سفیر نے آپریشن سندور کا جھوٹا اور مفاد پرستانہ بیان پیش کیا۔  ہندوستان  نے پہلگام حملے کے جواب میں گزشتہ سال مئی میں آپریشن سندور شروع کیا تھا جس کے تحت پاکستان اور پاکستان کے زیر انتظام کشمیر میں دہشت گرد ڈھانچوں کو نشانہ بنایا گیا تھا۔ پہلگام میں دہشت گرد حملے میں 26 شہری ہلاک ہوئے تھے۔
ہریش نے کہا کہ اس معاملے میں حقائق واضح ہیں۔ پاکستان کی سرپرستی میں سرگرم دہشت گردوں نے اپریل 2025  میں پہلگام میں ایک وحشیانہ حملہ کر کے26 بے گناہ شہریوں کو قتل کیا۔ اس باوقار ادارے نے خود اس قابل مذمت دہشت گرد کارروائی کے مجرموں، منصوبہ سازوں، مالی معاونین اور سرپرستوں کو جواب دہ ٹھہرانے اور انہیں انصاف کے کٹہرے میں لانے کی اپیل کی تھی۔ ہم نے بالکل وہی کیا۔ ہریش نے گزشتہ سال اپریل میں سلامتی کونسل کی جانب سے جاری کردہ پریس بیان کی طرف اشارہ کرتے ہوئے یہ بات کہی۔ 
اس بیان میں پندرہ رکنی ادارے نے پہلگام میں دہشت گرد حملے کی سخت الفاظ میں مذمت کی تھی اور اس قابل مذمت دہشت گرد کارروائی کے مجرموں، منصوبہ سازوں، مالی معاونین اور سرپرستوں کو جواب دہ ٹھہرانے اور انہیں انصاف کے کٹہرے میں لانے کی ضرورت پر زور دیا تھا۔ کونسل نے اس بات پر بھی زور دیا تھا کہ ان ہلاکتوں کے ذمہ دار افراد کو جواب دہ ٹھہرایا جانا چاہیے۔ 
ہریش نے واضح کیا کہ آپریشن سندور میں ہندوستان  کی کارروائی متوازن، کشیدگی میں اضافہ نہ کرنے والی اور ذمہ دارانہ تھی، اور اس میں دہشت گرد ڈھانچوں کو تباہ کرنے اور دہشت گردوں کو ناکارہ بنانے پر توجہ مرکوز کی گئی تھی۔ انہوں نے کہا کہ پاکستان نو مئی تک ہندوستان پر مزید حملوں کی دھمکیاں دے رہا تھا لیکن دس مئی کو پاکستانی فوج نے ہماری فوج کو براہ راست فون کر کے لڑائی روکنے کی درخواست کی۔
انہوں نے کہا کہ ہندوستانی کارروائی سے تباہ ہونے والے رن ویز اور جلنے والے ہینگرز کی تصاویر سمیت کئی پاکستانی فضائیہ کے اڈوں کو پہنچنے والے نقصان کی معلومات عوامی سطح پر دستیاب ہیں۔ ہریش نے جموں و کشمیر کا مسئلہ اٹھانے پر پاکستان پر سخت تنقید کرتے ہوئے کہا کہ ہندوستان کے داخلی معاملات پر تبصرہ کرنے کا پاکستان کو کوئی حق نہیں ہے۔ انہوں نے کہا کہ جموں و کشمیر ہندوستان کا ایک اٹوٹ اور ناقابل تقسیم حصہ رہا ہے، ہے اور ہمیشہ رہے گا۔
 ہریش نے سندھ طاس معاہدے پر کہا کہ ہندوستان نے 65 سال قبل خیر سگالی، دوستی اور رفاقت کے جذبے کے تحت یہ معاہدہ کیا تھا۔ انہوں نے کہا کہ ان ساڑھے چھ دہائیوں میں پاکستان نے تین جنگیں مسلط کر کے اور ہندوستان پر ہزاروں دہشت گرد حملے کر کے اس معاہدے کی روح کی خلاف ورزی کی ہے۔
پاکستان کی سرپرستی میں ہونے والے دہشت گرد حملوں میں ہزاروں ہندوستانی جانوں سے ہاتھ دھو بیٹھے ہیں۔ ہریش نے پہلگام دہشت گرد حملے کے تناظر میں کہا کہ ہندوستان بالآخر یہ اعلان کرنے پر مجبور ہوا کہ معاہدے کو اس وقت تک معطل رکھا جائے گا جب تک دہشت گردی کا عالمی مرکز پاکستان سرحد پار دہشت گردی اور دہشت گردی کی تمام دیگر اقسام کے لیے اپنی حمایت کو قابل اعتماد اور ناقابل واپسی طور پر ختم نہیں کر دیتا۔ 
 ہندوستان نے ساتھ ہی کہا کہ قانون کی بالادستی کے بارے میں پاکستان کو خود احتسابی کرنی چاہیے۔ انہوں نے پاکستان کے وزیر اعظم شہباز شریف کے دور حکومت میں گزشتہ سال نومبر میں منظور کیے گئے 27 ویں آئینی ترمیم کا حوالہ دیتے ہوئے کہا کہ وہ اس کی ابتدا یہ سوال اٹھا کر کر سکتا ہے کہ اس نے اپنی مسلح افواج کو 27 ویں ترمیم کے ذریعے آئینی تختہ الٹنے اور اپنی دفاعی افواج کے سربراہ کو قانونی کارروائی سے تاحیات چھوٹ دینے کی اجازت کیسے دی۔ یہ ترمیم پاکستان کے فیلڈ مارشل عاصم منیر کو کسی بھی قانونی کارروائی سے تاحیات استثنا فراہم کرتی ہے۔