اسلام آباد:پاکستان کے وزیر اعظم عمران خان نے امریکہ کے صدر ڈونالڈ ٹرمپ کے ساتھ افغان امن عمل اور کشمیر مسئلے پر بات کی ہے۔
وزیر اعظم کے دفتر کے مطابق عمران خان نے جمعرات کے روز فون پر صدرٹرمپ سے باہمی اور علاقائی امور پر تبادلہ خیال کیا۔ عمران خان نے افغانستان میں طالبان کی طرف سے دو مغربی یرغمالیوں کی رہائی کومثبت قدم قرار دیتے ہوئے کہا کہ پاکستان دونوں یرغمالیوں کی محفوظ رہائی سے خوش ہے۔
بیان کے مطابق صدر ٹرمپ نے اس مثبت قدم کو آسان بنانے میں پاکستان کی کوششوں کے اعتراف میں عمران خان کا شکریہ ادا بھی کیا۔خان نے افغانستان میں استحکام کے لیے افغان امن اور مفاہمت کے عمل کے فروغ کے لئے پاکستان کے عزم کا اعادہ کیا۔ دونوں رہنماؤں نے اس سلسلے میں ساتھ مل کر کام کرنے پر رضامندی ظاہر کی ہے۔
واضح رہے کہ اس سے قبل صدر ٹرمپ نے ہندوستان اور پاکستان کے درمیان کشمیر مسئلے کو حل کرنے میں ثالثی کی پیشکش کی ہے۔