انٹرنیشنل ڈیسک: گوئٹے مالا میں مشتبہ گروہوں کے حملوں میں مارے جانے والے پولیس اہلکاروں کی تعداد بڑھ کر پیر کے روز نو ہو گئی ہے، اور اسی دوران صدر برنارڈو اریوالو نے  ایمر جنسی ( ہنگامی حالت)  کا اعلان کر دیا ہے۔ اس اعلان کے ساتھ ہی ملک میں شہری حقوق پر سخت پابندیاں نافذ کر دی گئی ہیں۔ ملک میں تشدد کا آغاز ہفتے کے روز ہوا، جب قیدیوں نے مربوط ہنگاموں کے دوران تین جیلوں پر قبضہ کر لیا اور 43 سکیورٹی اہلکاروں کو یرغمال بنا لیا۔ حکام کے مطابق، یہ گروہ اپنے ارکان اور رہنماؤں کے لیے خصوصی سہولتوں کا مطالبہ کر رہے تھے۔
اتوار کی صبح پولیس کی جانب سے ایک جیل کو آزاد کرانے کے کچھ ہی دیر بعد دارالحکومت گوئٹے مالا سٹی میں مشتبہ گروہ کے ارکان نے پولیس پر حملے کیے۔ نیشنل سول پولیس کے ڈائریکٹر ڈیوڈ کسٹوڈیو بوتیو نے پیر کو بتایا کہ ایک پولیس افسر زخموں کی وجہ سے پیر کی علی الصبح موت کا شکار ہو گیا۔ اس کے ساتھ ہی مارے جانے والے پولیس اہلکاروں کی تعداد نو ہو گئی ہے، جبکہ کئی زخمیوں کی حالت نازک ہے اور زخموں کے باعث بعض پولیس اہلکاروں کے اعضا کاٹنے بھی پڑے ہیں۔
اس دوران، سرکاری گزٹ میں شائع ہونے والے حکم کے مطابق 30 دن کی ہنگامی حالت کے دوران نقل و حرکت کی آزادی، احتجاج اور ہتھیار رکھنے جیسے حقوق محدود کر دیے گئے ہیں۔ پولیس کو بغیر واضح وجہ گرفتاری کا اختیار دے دیا گیا ہے اور بعض علاقوں میں گاڑیوں کی آمد و رفت روکی جا سکتی ہے۔ اگرچہ ہنگامی حالت کے لیے پارلیمان کی منظوری ضروری ہے، لیکن یہ اتوار سے نافذ ہو چکی ہے۔ سکیورٹی وجوہات کی بنا پر پیر کے روز پورے ملک میں اسکول بند کر دیے گئے تھے۔