اسلام آباد: پاکستان نے جمعرات کو کہا کہ چین کے ساتھ اس کی دوستی کے "دشمن" ایک دہشت گردانہ حملے کے ذمہ دار تھے جس میں پانچ چینی شہری ہلاک ہوئے۔ اس کے ساتھ ہی پاکستان نے دہشت گردانہ حملے کے ذمہ داروں کو انصاف کے کٹہرے میں لانے کے عزم کا اظہار کیا۔ پاکستان کے شورش زدہ شمال مغربی صوبے خیبر پختونخوا میں منگل کو دھماکہ خیز مواد سے بھری گاڑی ایک بس سے ٹکرا گئی، جس میں کم از کم پانچ چینی شہریوں سمیت چھ افراد ہلاک ہو گئے۔
 چینی شہری داسو پن بجلی منصوبے پر کام کر رہے تھے۔ دفتر خارجہ کی ترجمان ممتاز زہرہ بلوچ نے ہفتہ وار پریس کانفرنس میں کہا کہ پاکستان اس گھناؤنے واقعے کے حوالے سے چینی حکومت سے رابطے میں ہے۔ انہوں نے دشمنوں کی شناخت ظاہر کیے بغیر کہا کہ پاکستان اور چین گہرے دوست ہیں۔ ہمیں اس میں کوئی شک نہیں کہ یہ دہشت گردانہ حملہ پاک چین دوستی کے دشمنوں نے کیا۔انہوں نے کہا کہ پاکستان "دہشت گردوں اور ان کے سہولت کاروں کو انصاف کے کٹہرے میں لانے کے لیے پوری طرح پرعزم ہے۔ 
ممتاز زہرہ بلوچ نے کہا کہ اس طرح کے گھناؤنے حملے دہشت گردی سے لڑنے کے پاکستان کے عزم کو مزید تقویت دیتے ہیں۔ انہوں نے کہا کہ پاکستان اور چین مل کر دہشت گردوں کے خلاف بھرپور کارروائی کریں گے۔ دفتر خارجہ کے ترجمان نے کہا کہ  پاکستان اپنے چینی بھائیوں کے ساتھ مل کر کام کرتا رہے گا تاکہ پاکستان میں چینی شہریوں، منصوبوں اور اداروں کی حفاظت کو یقینی بنایا جا سکے۔