ڈھاکہ: بنگلہ دیش کی سیاست میں پہلی بار ہائی ٹیک انتخابی حکمت عملی دیکھنے کو ملی ہے۔ دارالحکومت ڈھاکہ میں بنگلہ دیش نیشنلسٹ پارٹی  ( بی این پی ) کی ایک بڑی ریلی کے دوران ایلون مسک کی سیٹلائٹ انٹرنیٹ سروس اسٹارلنک کا استعمال کیا گیا۔ پارٹی کے رضاکاروں نے پورٹیبل اسٹارلنک ٹرمینل کے ذریعے ہزاروں حامیوں کو مفت وائی فائی فراہم کیا۔ اس تکنیکی اقدام کا مقصد خراب موبائل نیٹ ورک اور شدید بھیڑ کے باعث پیدا ہونے والے کنیکٹیویٹی مسائل سے بچنا تھا۔ ریلی کے مقام پر موجود رضاکار بیگ کی طرح کے پورٹیبل اسٹارلنک ٹرمینل اٹھائے گھومتے نظر آئے، جس سے لوگ بغیر کسی رکاوٹ کے سوشل میڈیا پر براہ راست ویڈیوز، تصاویر اور تازہ معلومات شیئر کر سکے۔
سیاسی تجزیہ کاروں اور سوشل میڈیا صارفین کا ماننا ہے کہ بنگلہ دیش میں سیاسی ریلیوں کے دوران سیٹلائٹ انٹرنیٹ کا یہ پہلا استعمال ہے۔ اسے ڈیجیٹل سیاست کی سمت میں ایک بڑی تبدیلی قرار دیا جا رہا ہے، جہاں سیاسی جماعتیں اب ٹیکنالوجی کے ذریعے نوجوانوں اور شہری ووٹروں سے جڑنے کی حکمت عملی اپنا رہی ہیں۔ موجودہ سیاسی حالات میں بنگلہ دیش نیشنلسٹ پارٹی کو 2026 میں ہونے والے 13 ویں پارلیمانی انتخابات کی سب سے مضبوط دعوے دار سمجھا جا رہا ہے۔ اگست 2024 میں شیخ حسینہ کے اقتدار سے ہٹنے کے بعد، نوبل انعام یافتہ محمد یونس کی قیادت میں قائم عبوری حکومت کے دور میں بنگلہ دیش نیشنلسٹ پارٹی ایک اہم سیاسی قوت کے طور پر ابھری ہے۔
17  برس کی جلاوطنی کے بعد بنگلہ دیش نیشنلسٹ پارٹی کے قائم مقام چیئرمین طارق رحمان25  دسمبر 2025 کو لندن سے بنگلہ دیش واپس لوٹے۔ رائے عامہ کے سروے میں بنگلہ دیش نیشنلسٹ پارٹی کو سب سے زیادہ نشستیں حاصل کرنے کا امکان ظاہر کیا جا رہا ہے۔ پارٹی نوجوانوں اور خواتین کو زیادہ نمائندگی دینے کے اشارے بھی دے چکی ہے۔ بنگلہ دیش نیشنلسٹ پارٹی نے جماعت اسلامی کے ساتھ پرانے اتحاد کو تقریبا ختم کر دیا ہے اور خود کو ایک لبرل، معتدل اور سیکولر متبادل کے طور پر پیش کرنے کی کوشش کر رہی ہے۔
 'پلان 2 بلڈ بنگلہ  دیش ' کے تحت تعلیمی اصلاحات، نوجوانوں کی تربیت اور معاشی استحکام کو ترجیح دی جا رہی ہے۔ سیاسی ماہرین کا کہنا ہے کہ ڈھاکہ کی ریلی میں اسٹارلنک کا استعمال محض ایک تکنیکی تجربہ نہیں بلکہ اس بات کا اشارہ ہے کہ آنے والے انتخابات میں ٹیکنالوجی بنگلہ دیش کی سیاست اور اقتدار کی کشمکش کی سمت متعین کرے گی۔