رامپور: اترپردیش کے رام پور سے سماج وادی پارٹی کے رکن پارلیمنٹ اعظم خان نے اپنی اہلیہ کے لئے ایک عوامی اجلاس کو خطاب کیا۔ اعظم خان کی اہلیہ ڈاکٹر تزئین فاطمہ ضمنی الیکشن میں ایس پی کی امیدوار ہیں۔ اجلاس سے خطاب کرتے ہوئے اعظم خان نے عوام سے ووٹ مانگے۔لمبے عرصے کے بعد جمعہ کو ایک اجلاس کو خطاب کرتے ہوئے ان کا درد چھلک آیا اور وہ جذباتی ہو گئے۔ انہوںنے بھرے گلے سے رامپور والے لوگوں سے اپنی حفاظت کی گہار لگائی۔
اعظم خان نے اجلاس میں موجود لوگوں سے کہا کہ ' میری حفاظت کرو ، مجھے سنبھالو، مجھے تھکنے مت دو، میری آواز کو کمزور مت پڑ نے دو ، میرے ماتھے پر لکھی بدقسمتی کی لکیروں کو پڑھنے کی کوشش کرو۔ کہیں ایسا نہ ہو کہ آنے والے دنوں میں مجھ جیسا کوئی بکری چور نہ پیدا ہو، جو تمہارے بچوں کے ہاتھوں میں قلم دینا چاہتاہو۔اعظم خان نے کہا کہ میرا گناہ ہے کہ میں نے لوگوں کے لئے اسکول بنائے اور غلامی چھین کر علم کا قلم دینے کی غلطی کی۔ لیکن مجھے بکری چور ، مرغی چور اور بھینس چور کہہ دیا گیا۔انہوں نے کہا کہ جو یہاں کرو گے اس کا حساب زمین پر ہی ہو گا، قبر میں نہیں۔
ایس پی رکن پارلیمنٹ نے کہا میرے عزیزو میرا گناہ کیا ہے؟ انسانیت اور انسانوں کے لئے لڑنے والا ایک بے سہارا شخص جو تمہارے آنسو پونچھنے کے لئے آیا تھا، جس نے تمہارے سوکھے ہوئے جسم میں سانسیں ڈالنی چاہی تھیں، جو غلامی کی مضبوط زنجیروں کو اپنے ہاتھوں سے توڑ کر تمہاری پیشانی پر لکھے غلامی کے داغ کو مٹا دینا چاہتا تھا۔ چکی کے پاٹوں کے بیچ 42 برس تک اپنے آپ کو مسلتا رہا۔ میری آواز بہت دور تک گئی۔ میرے دل کی دھڑکنوں نے لوگوں کے دل چیر دئیے۔ میں جیت گیا۔ بے آوازوں کی میں آواز بنا۔ میں نے للکار کے کہا میں زباں ہوں تمہاری۔ میں درد ہوں تمہارا۔ تمہارے دل کی دھڑکن ہوں۔ میں آبرو ہوں تمہاری۔
اعظم خان نے واضح کیا کہ یہ میرا گناہ ہے کہ میں نے تمہارے لئے اسکول بنائے۔ بتا ؤتاریخ لکھنے والو میرے اس گناہ کی سزا کیا ہے؟ تمہارے ہاتھ سے غلامی کی لعنت کو چھین کر علم کا قلم دینے کی جو غلطی میں نے کی ہے اس کی سزا کی تفصیل اگر سنو گے تو تمہارے کانوں سے خون بہنے لگے گا اور تمہارا دل بھر جائے گا۔ جذباتی اعظم خان نے کہا کہ مجھ سے انتقام لینے والو یاد رکھنا زمین پر جو کرو گے اس کا حساب قبر میں نہیں ہو گا۔
انتخابی اجلاس سے خطاب کرتے ہوئے اعظم خان دوبارہ جذباتی ہو گئے۔ انہوں نے کہا کہ کل کو جب میری برائی لکھی جائے گی اور جب میرے خون کے آنسو میری تعریف کر رہے ہوں تو لوگ یہ یاد رکھیں کہ ایک ایسا شخص بھی زمین پر پیدا ہوا تھا جس نے تمہاری نسلوں کے لئے مرغیاں چرائی تھیں، بکریاں چرائی تھیں، بھینسیں چرائی تھیں، کتابیں چرائی تھیں، وہ ڈاکو تھا مگر وہ تمہارے لئے قلم لے کر آیا تھا۔ انہوں نے حکومت اور انتظامیہ پر نشانہ سادھتے ہوئے کہ کہا کہ شرم آتی ایسی حکومت اور انتظامیہ پر۔ بتا دیں کہ یوپی کی 11 اسمبلی سیٹوں کے ضمنی الیکشن میں 21 اکتوبر کو ووٹنگ ہو گی۔