انٹرنیشنل ڈیسک: جنوبی فلپائن میں 350 سے زیادہ افراد کو لے کر جا رہی ایک کشتی آدھی رات کے بعد ڈوب گئی جس کے بعد امدادی کارکنوں نے کم از کم 215 مسافروں کو بچا لیا اور سات لاشیں برآمد کی ہیں۔ حکام نے پیر کو یہ جانکاری دی۔ ساحلی محافظ اہلکاروں نے بتایا کہ بین الجزیری مال بردار اور مسافر کشتی ایم وی ترشا کیرسٹن 3 زامبوانگا بندرگاہی شہر سے سولو صوبے کے جنوبی جولو جزیرے کی طرف جا رہی تھی۔
کشتی میں 332 مسافر اور عملے کے 27 ارکان سوار تھے کہ اسی دوران تکنیکی خرابی آنے کے بعد کشتی ڈوب گئی۔ جہاں کشتی ڈوبی اس کے قریب واقع جزیرہ نما صوبہ باسیلان کے گورنر مجیو حاتامن نے بتایا کہ مسافروں اور دو لاشوں کو صوبائی دارالحکومت اسابیلا لایا گیا ہے۔
فلپائن ساحلی محافظ اور بحریہ باسیلان صوبے کے ساحل کے قریب تلاش اور بچاو مہم چلا رہے ہیں۔ فلپائن کے جزیرہ نما خطے میں سمندری حادثات عام ہیں جن کی وجہ اکثر شدید طوفان، کشتیوں کی ناقص دیکھ بھال، حد سے زیادہ بھیڑ اور حفاظتی قواعد کے نفاذ میں نرمی کو قرار دیا جاتا ہے۔