انٹرنیشنل ڈیسک: یونان کے کریٹ جزیرے میں جمعرات کی صبح 6.1 شدت کا زلزلہ آیا جس کے جھٹکے پورے بحیرہ ایجین میں محسوس کیے گئے۔ تاہم زلزلے میں کسی جانی یا مالی نقصان کی کوئی اطلاع نہیں ہے۔ ایتھنز کے انسٹی ٹیوٹ آف جیوڈینامکس کے مطابق یہ زلزلہ ایلونڈا سے 55 کلومیٹر شمال-شمال مشرق میں سطح سمندر سے 37 کلومیٹر کی گہرائی میں آیا۔ ایلونڈا جزیرے کریٹ کے شمالی ساحل پر واقع ہے۔ امریکی جیولوجیکل سروے کے مطابق زلزلہ 69 کلومیٹر کی گہرائی میں آیاتھا۔
علاقائی سرکاری اہلکار جیورگوس ساپاکوس نے متاثرہ علاقوں کے ابتدائی جائزے کے بعد سرکاری ٹیلی ویژن کو بتایا کہ "زلزلے سے کسی قسم کے نقصان کی کوئی اطلاع نہیں ہے۔زلزلے کے جھٹکے بحیرہ ایجین کے تمام جزیروں میں بڑے پیمانے پر محسوس کیے گئے۔ زلزلہ اور منصوبہ بندی پروٹیکشن آرگنائزیشن کے ڈائریکٹر ایفتھی مئوس لیکاس( Efthimios Lekkas ) نے کہا کہ سمندر کی گہرائی میں آنے والے زلزلے عام طور پر سطح کو کم نقصان پہنچاتے ہیں۔ یونان ایک ایسے علاقے میں واقع ہے جہاں زلزلے  کا امکان رہتا ہے اور اکثر زلزلے کی سرگرمیاں یہاں ہوتی رہتی ہیں۔