اسلام آباد: پاکستان کے ضلع سکھر کے کندھرا پھاٹک پر مسافر بس کے ٹرین کی زد میں آنے کے نتیجے میں 30افراد ہلاک اور 17 زخمی ہوگئے۔ میڈیا رپورٹ کے مطابق روہڑی کے قریب کندھرا پھاٹک پر مسافر بس کراچی سے پنجاب جانے والی پاکستان ایکسپریس کی زد میں آگئی جس کے نتیجے میں30 افراد ہلاک اور 17 زخمی ہو گئے۔
پولیس کے مطابق مسافر کوچ سکھر سے سرگودھا جا رہی تھی، ہا ئی وے پر ٹریفک بلاک کی وجہ سے ڈرائیور نے لنک روڈ سے شارٹ کٹ لیتے ہوئے مسافر کوچ ریلوے ٹریک پر چڑھا دی جہاں سرے سے پھاٹک موجود ہی نہیں تھا اور کوچ ٹرین کی زد میں آگئی۔سکھر ضلع کی پولیس کے اے آئی جی ڈاکٹر جمیل احمد نے ڈان نیوز کو بتایا کہ یہ ایک انتہائی خوفناک حادثہ تھا، ٹرین سے ٹکراتے ہی بس کے پرخچے اڑ گئے اور وہ تین حصوں میں بٹ گئی۔ اس کے ساتھ ہی انہوں نے کہا کہ تصادم اتنا زبردست تھاکہ ٹرین نے بس کو تقریبا 150-200 فٹ تک اپنے ساتھ گھسیٹ لیا ۔
پولیس کا کہنا ہے کہ حادثہ کی اطلاع ملتے ہی ریسکیو اور پولیس کی ٹیمیں جائے حادثہ پر پہنچ گئیں اور لاشوں و زخمیوں کو ہسپتال منتقل کردیا گیا۔دوسری جانب ریلوے ذرائع کا کہنا ہے کہ مسافر کوچ ٹرین کی زد میں آنے سے پاکستان ایکسپریس کے انجن کو شدید نقصان پہنچا جس کے بعد سے ٹرین ٹریک پر ہی موجود ہے جس کے سبب ریلوے انتظامیہ نے اپ ڈان ٹریک بند کردیا ہے جس سے اس روٹ پر ٹرینوں کی آمد و رفت معطل ہو گئی ہے۔