انٹرنیشنل ڈیسک:  وزیر اعظم نریندر مودی آٹھ سال بعد عمان کے دورے پر ہیں۔ وہ 17 اور18  دسمبر کو عمان کے سلطان ہیثم بن طارق آل سعید کی دعوت پر وہاں قیام کریں گے۔ یہ وزیر اعظم مودی کا دوسرا عمان دورہ ہے۔ اس سے پہلے وہ فروری 2018  میں عمان گئے تھے۔ اس دورے میں وزیر اعظم مودی کے ساتھ ایک اعلی سطحی وفد بھی موجود رہے گا۔ اس سفر کا مقصد دونوں ممالک کے درمیان دو طرفہ تعلقات کو مضبوط بنانا اور اقتصادی و تزویراتی شراکت داری کو فروغ دینا ہے۔ خیال کیا جا رہا ہے کہ اس دوران کئی اہم معاہدوں پر بھی مہر لگ سکتی ہے۔
عمان کی تزویراتی اہمیت
عمان خلیج کا پہلا ملک ہے جس کے ساتھ  ہندوستان  کی تینوں مسلح افواج مشترکہ مشقیں کرتی ہیں۔ دونوں ممالک بحر ہند میں سمندری سلامتی کو یقینی بنانے کے لیے تعاون کرتے ہیں۔ عمان خلیج تعاون کونسل، عرب لیگ اور انڈین اوشن رم ایسوسی ایشن میں بھی اہم کردار ادا کرتا ہے۔ 2023 میں  ہندوستان  نے اپنی صدارت کے دوران عمان کو جی20 اجلاس میں مہمان ملک کے طور پر مدعو کیا تھا۔
جگوار فائٹر جیٹس اور دفاعی شراکت داری
عمان کی رائل ایئر فورس نے اپنے جگوار طیاروں کو سروس سے باہر کر دیا ہے اور اسپیئر پارٹس کی فراہمی  ہندوستان  کو کرنے کی پیشکش کی ہے۔ اس سے  ہندوستان میں پرانے جگوار طیاروں کی دیکھ بھال میں سہولت ہوگی۔ عمان کے سفیر عیسی صالح عبداللہ صالح الشیبانی نے کہا کہ یہ قدم دونوں ممالک کے گہرے دفاعی تعلقات کا ثبوت ہے۔

Delhi: On Oman handing over 20 fighter jets to India, Oman Ambassador to India Issa Saleh Abdullah Saleh Alshibani says, "I think this is more of a justification of how deep the defence relationship is. We are the first and maybe the only country that has conducted joint… pic.twitter.com/Rrh6tjXhqn

— IANS (@ians_india) December 10, 2025

فری ٹریڈ معاہدے کا امکان
وزیر اعظم مودی کے دورے کے دوران  ہندوستان  اور عمان کے درمیان فری ٹریڈ معاہدے پر بھی بات چیت ہو سکتی ہے۔ 2023  میں اس پر مذاکرات شروع ہوئے تھے۔ اس معاہدے کے تحت دونوں ممالک زیادہ تر اشیا ء پر کسٹم ڈیوٹی کم یا ختم کریں گے اور تجارت و سرمایہ کاری کو فروغ دینے کے لیے قواعد کو آسان بنائیں گے۔ عمان کی شورا کونسل نے فری ٹریڈ معاہدے کو حال ہی میں منظوری دے دی ہے۔
 ہندوستان  اور عمان کی تجارت
2024-25  میں  ہندوستان  اور عمان کے درمیان دو طرفہ تجارت تقریبا 10.5  ارب امریکی ڈالر رہی۔ ہندوستان  عمان سے بنیادی طور پر پیٹرولیم مصنوعات اور یوریا خریدتا ہے جن کی شراکت کل درآمدات میں ستر فیصد سے زیادہ ہے۔ اس کے علاوہ پروپیلین، ایتھیلین پولیمر، پیٹ کوک، جپسم، کیمیکل، لوہا اور ایلومینیم بھی خریدا جاتا ہے۔  ہندوستان  سے عمان کو معدنی ایندھن، کیمیکل، قیمتی دھاتیں، لوہا، اناج، جہاز، کشتیاں، برقی مشینری، بوائلر، چائے، کافی، مصالحہ جات، ملبوسات اور غذائی مصنوعات برآمد کی جاتی ہیں۔