نیشنل ڈیسک: دنیا بھر میں سرکاری قرض اپنی ریکارڈ سطح تک پہنچ گیا ہے۔ جنوری 2026 کے اعداد و شمار اور اقتصادی سروے 2025-26 کے مطابق کئی بڑی معیشتیں بھاری قرض کے بوجھ تلے دبی ہوئی ہیں۔ کہیں جنگ کی وجہ سے اخراجات بڑھے ہیں تو کہیں بڑھتی ہوئی آبادی، فلاحی منصوبے اور طویل عرصے سے جاری مالی خسارہ تشویش کی وجہ بنا ہوا ہے۔ ایسے میں ایک بڑا سوال یہ ہے کہ دنیا میں سب سے زیادہ قرض کس ملک پر ہے اور اس فہرست میں  ہندوستان کی حیثیت کیا ہے۔
سب سے زیادہ قرض والا ملک کون؟ 
ریاستہائے متحدہ امریکہ دنیا کا سب سے زیادہ قرض دار ملک بنا ہوا ہے۔ امریکہ پر کل سرکاری قرض تقریباً 38.3 ٹریلین ڈالر ہے۔ یہ دنیا کے مجموعی عوامی قرض کا تقریباً ایک تہائی حصہ ہے۔ ماہرین کے مطابق امریکہ کی ریزرو کرنسی(ڈالر)  کی حیثیت، بھاری فوجی اخراجات، سماجی فلاحی منصوبے اور بار بار ہونے والا بجٹ خسارہ اس کی بڑی وجوہات ہیں۔ اسی وجہ سے امریکہ مسلسل بڑے پیمانے پر قرض لیتا رہا ہے۔
چین، جاپان اور یورپ کی بڑی معیشتیں
امریکہ کے بعد چین دوسرے نمبر پر ہے۔ چین پر کل سرکاری قرض تقریباً 18.7 ٹریلین ڈالر ہے۔ یہ قرض بڑے پیمانے پر بنیادی ڈھانچے کے منصوبوں، مقامی حکومتوں کے قرض اور اقتصادی محرک اسکیموں کی وجہ سے بڑھا ہے۔ جاپان تقریبا 9.8 ٹریلین ڈالر کے قرض کے ساتھ تیسرے نمبر پر ہے۔ اس کے بعد
یونائیٹڈ کنگڈم :  تقریبا 4.1 ٹریلین ڈالر۔
فرانس :  تقریبا 3.9 ٹریلین ڈالر۔
اٹلی :  تقریبا 3.5 ٹریلین ڈالر۔
ہندوستان کی پوزیشن کیا ہے ؟
کل سرکاری قرض کے معاملے میں ہندوستان ساتویں نمبر پر ہے۔ ہندوستان کا کل سرکاری قرض اور واجبات تقریبا 3.8 ٹریلین ڈالر لگائے گئے ہیں۔ تاہم ماہرین کا ماننا ہے کہ صرف کل قرض سے اصل صورتحال واضح نہیں ہوتی۔ کسی ملک کی قرض کی حالت سمجھنے کے لیے قرض سے جی ڈی پی کا تناسب زیادہ اہم مانا جاتا ہے۔
قرض سے جی ڈی پی تناسب میں حالات
قرض سے جی ڈی پی تناسب کے لحاظ سے سوڈان سب سے زیادہ بحران میں ہے جہاں یہ تناسب 221 فیصد سے 252 فیصد کے درمیان ہے۔ بڑی معیشتوں میں جاپان کا قرض سے جی ڈی پی تناسب تقریباً 237 فیصد ہے جو کافی زیادہ سمجھا جاتا ہے۔
قرض سے جی ڈی پی میں ہندوستان کہاں کھڑا ہے
ہندوستان کا قرض سے جی ڈی پی تناسب تقریبا 81.9 فیصد ہے۔ اس بنیاد پر ہندوستان دنیا میں تقریبا ً31ویں سے 35ویں نمبر کے درمیان آتا ہے۔ حکومت کا ہدف ہے کہ 2031 تک اس تناسب کو کم کر کے تقریباً 50 فیصد تک لایا جائے۔ ہندوستان کی ایک بڑی مضبوطی یہ ہے کہ اس کا 95 فیصد سے زیادہ قرض ملکی ذرائع سے لیا گیا ہے۔ اس سے غیر ملکی زر مبادلہ اور بیرونی ادائیگیوں سے متعلق خطرات کافی کم ہو جاتے ہیں۔ ہندوستان کے کل قرض میں بیرونی قرض 5 فیصد سے بھی کم ہے۔