میڈرڈ / میلان: اتوار کی شام اسپین کے جنوب میں ایک بڑا ریل حادثہ پیش آیا، جس میں کل 39 افراد کے ہلاک ہونے کی تصدیق ہوئی ہے۔ اس حادثے میں کئی افراد زخمی بھی ہوئے ہیں، جو ہسپتال میں زیر علاج ہیں۔ ذرائع کے مطابق حادثے میں ہلاک ہونے والے افراد کی تعداد مزید بڑھ سکتی ہے۔سرکاری ذرائع کے مطابق یہ اسپین میں تقریباً ایک دہائی سے زیادہ عرصے میں سب سے خوفناک ریل حادثہ ہے، جس میں درجنوں افراد زخمی ہوئے ہیں۔ اتوار کی شام آدموز سے میڈرڈ جانے والی ایک ریل گاڑی کے ڈبے پٹری سے اتر گئے اور جو دوسری طرف کی پٹریوں پر چڑھ گئے، وہ دوسری جانب سے آ رہی ایک اور ریل گاڑی سے ٹکرا گئے، جس کے نتیجے میں حادثہ ہوا۔ ریل حکام نے بتایا کہ دونوں ریل گاڑیوں میں 400 مسافر اور عملے کے افراد سوار تھے۔ ایمرجنسی سروسز نے 122 افراد کا علاج کیا، جن میں سے 48 (جن میں 5 بچے شامل ہیں) اب بھی ہسپتال میں زیر علاج ہیں۔ زخمیوں میں سے 11 بالغ اور ایک بچہ انٹینسیو کیئر میں ہیں، جن کی حالت نازک ہے۔
اسپین کے وزیر نقل و حمل نے اس واقعے کو بہت خوفناک قرار دیا۔ ریل گاڑی میں سفر کرنے والے افراد نے بتایا کہ ٹکر بہت شدید تھی، مسافروں نے ڈبوں کی کھڑکیاں توڑنے اور باہر نکلنے کے لیے ایمرجنسی ہتھوڑوں کا استعمال بھی کیا۔ فی الحال واقعے کے اصل اسباب کا پتہ لگایا جا رہا ہے۔ ریل گاڑی تقریباً 250 کلومیٹر فی گھنٹہ کی رفتار سے چل رہی تھی۔