واشنگٹن: امریکہ میں غیر قانونی طور پر مقیم ایک ہندوستانی  ٹرک ڈرائیور کی جانب سے کئی گاڑیوں کو ٹکر مارنے کے دوران شدید زخمی ہونے والی ایک کم عمر بچی کو صدر ڈونالڈ ٹرمپ نے امریکی کانگریس کے مشترکہ اجلاس سے خطاب کے موقع پر اعزاز دیا۔ اس حادثے میں بچی کو سنگین چوٹیں آئیں اور وہ اس وقت معذوری کے ساتھ زندگی گزار رہی ہے۔ کیپیٹل عمارت میں اپنے سالانہ صدارتی خطاب کے دوران ٹرمپ نے کہا کہ جون 2024 میں اٹھارہ پہیوں والے ٹرک نے بچی کی کھڑی گاڑی کو ٹکر مار دی تھی۔ انہوں نے بتایا کہ دلیلا کولمین اس وقت صرف پانچ سال کی تھی۔
انہوں نے کہا کہ ٹرک ڈرائیور ایک غیر قانونی مہاجر تھا جسے جو بائیڈن نے ملک میں آنے دیا تھا اور کیلیفورنیا میں کھلی سرحد کے حامی رہنماؤں نے اسے تجارتی ڈرائیونگ لائسنس جاری کیا تھا۔ اپنے خطاب میں ٹرمپ نے ڈرائیور کی شناخت ظاہر نہیں کی۔ گزشتہ سال اگست میں امریکہ میں غیر قانونی طور پر داخل ہونے والے پرتاپ سنگھ کو کیلیفورنیا میں ٹرک چلاتے ہوئے کئی گاڑیوں کو ٹکر مارنے کے الزام میں گرفتار کیا گیا تھا، جس میں کولمین شدید زخمی ہو گئی تھی۔ ٹرمپ نے کہا کہ ڈاکٹروں نے بتایا تھا کہ کولمین کبھی چل پھر یا بول نہیں سکے گی اور نہ ہی پہلے کی طرح بہتر زندگی گزار پائے گی۔
انہوں نے کہا کہ وہ کھانا بھی نہیں کھا پاتی۔ لیکن تمام مشکلات کے باوجود وہ اب پہلی جماعت میں ہے، چلنا سیکھ رہی ہے اور آج شام اپنے والد کے ساتھ یہاں موجود ہے۔ کولمین، آپ ایک مثال ہیں۔ وہاں موجود ارکان کانگریس اور خصوصی مہمانوں نے کھڑے ہو کر تالیاں بجا کر کولمین کا استقبال کیا۔ ٹرمپ نے کہا کہ بہت سے غیر قانونی مہاجر انگریزی نہیں بولتے اور سمت، رفتار، خطرے یا مقام سے متعلق بنیادی سڑک کے اشارے بھی نہیں پڑھ سکتے۔ انہوں نے تالیوں کے درمیان کہا کہ اسی لیے آج رات میں کانگریس سے اپیل کر رہا ہوں کہ وہ ایک بل منظور کرے جسے دلیلا قانون کہا جائے گا، جو کسی بھی ریاست کو غیر قانونی مہاجروں کو تجارتی ڈرائیونگ لائسنس جاری کرنے سے روکے گا۔