انٹرنیشنل ڈیسک: نیپال کی نئی زندہ دیوی کے طور پر منتخب ہوئی دو سالہ بچی کو ملک کے سب سے طویل اور اہم ہندو تہوار کے دوران منگل کو کٹھمنڈو کی ایک گلی میں واقع ان کے گھر سے خاندان کے افراد مندر لے گئے ۔ دو سال اور آٹھ مہینے کی عمر میں آریہ تارا شاکیہ  کو نئی کماری یا "کماری دیوی" کے طور پر منتخب کیا گیا، جو موجودہ کماری کی جگہ لیں گی جسے روایت کے مطابق بلوغت حاصل ہونے پر عام انسان سمجھا جاتا ہے۔ ہندو اور بودھ دونوں زندہ دیویوں کی پوجا کرتے ہیں۔ ان بچیوں کا انتخاب دو سے چار سال کی عمر کے درمیان کیا جاتا ہے اور ان کی جلد، بال، آنکھیں اور دانت بے داغ ہونے چاہئیں۔

انہیں اندھیرے سے خوفزدہ نہیں ہونا چاہیے۔ مذہبی تہواروں کے دوران، زندہ دیوی کو عقیدت مندوں کے ذریعہ کھینچے جانے والے رتھ پر گھمایا جاتا ہے۔ وہ ہمیشہ سرخ لباس پہنتی ہیں، بالوں میں چوٹی باندھتی ہیں اور ماتھے پر "تیسری آنکھ" نقش ہوتی ہے۔ منگل کو خاندان، دوستوں اور عقیدت مندوں نے شاکیہ کو کٹھمنڈو کی سڑکوں پر سواری کرائی، جس کے بعد انہیں مندر کے محل میں داخل کیا گیا، جو کئی سالوں تک ان کا گھر رہے گا۔ عقیدت مند لڑکی کے قدموں کو چھونے کے لیے قطاروں میں کھڑے ہو کر انہیں پھول اور دولت پیش کرتے ہیں۔ نئی کماری جمعرات کو صدر سمیت عقیدت مندوں کو آشیرواد دیں گی۔

آریہ تارا شاکیہ کے والد اننت شاکیہ  نے کہا کہ کل تک وہ میری بیٹی تھی، لیکن آج وہ دیوی ہے۔ انہوں نے کہا کہ آریہ تارا کی پیدائش سے پہلے ہی اشارے مل رہے تھے کہ وہ دیوی بنے گی۔ اننت نے کہا کہ حمل کے دوران میری بیوی نے خواب دیکھا تھا کہ وہ ایک دیوی ہے اور ہم جانتے تھے کہ وہ ایک بہت خاص انسان بننے والی ہے۔ سابق "کماری دیوی" ترشنا شاکیہ، جو اب 11 سال کی ہو چکی ہیں، اپنے خاندان اور حمایتیوں کے ذریعہ اٹھائی ہوئی پالکی پر سوار ہو کر پچھلے دروازے سے روانہ ہوئیں۔ وہ 2017 میں زندہ دیوی بنی تھیں۔ منگل کو دشئیں کا آٹھواں دن ہے، جو برائی پر بھلائی کی جیت کا 15 روزہ تہوار ہے۔ اس دوران دفاتر اور اسکول بند رہتے ہیں اور لوگ اپنے خاندانوں کے ساتھ جشن مناتے ہیں۔

کماری دیویاں تنہائی کی زندگی گزارتی ہیں۔ ان کے چند ہی منتخب ساتھی ہوتے ہیں اور انہیں سال میں صرف چند ہی بار تہواروں پر باہر جانے کی اجازت ہوتی ہے۔ سابقہ  کماری دیویوں کو عام زندگی میں ڈھلنے، گھر کے کام سیکھنے اور باقاعدہ اسکول جانے میں مشکلات کا سامنا کرنا پڑ سکتا ہے۔ نیپالی لوک کہانیوں کے مطابق، جو مرد سابقہ کماری دیویوں سے شادی کرتے ہیں، ان کی موت کم عمری میں ہو جاتی ہے، اور کئی لڑکیاں غیر شادی شدہ رہ جاتی ہیں۔ پچھلے چند سالوں میں روایت میں کئی تبدیلیاں آئیں ہیں اور اب سابقہ کماری دیویوں کو مندر کے احاطے میں نجی اساتذہ سے تعلیم حاصل کرنے اور ایک ٹیلی ویژن سیٹ رکھنے کی اجازت دی گئی ہے۔ حکومت اب ریٹائرڈ کماری دیویوں کو ماہانہ پنشن بھی دیتی ہے۔