کولمبو: سری لنکا میں 'گڈ فرائیڈے' کے موقع پر گرجا گھروں کے ارد گرد خصوصی نگرانی رکھی جا رہی ہے اور ملک کے مختلف مقامات پر سیکیورٹی کے سخت انتظامات کیے گئے ہیں۔ ایک سینئر پولیس افسر نے یہ جانکاری دی۔ پولیس کے ترجمان نہال تھلڈووا نے کہا کہ 'گڈ فرائیڈے' کے موقع پر ملک بھر میں 6000 سے زیادہ پولیس اہلکار، 3000 سے زیادہ فوجی اور 400 سے زیادہ اسپیشل ٹاسک فورس (STF) کے ارکان کو تعینات کیا گیا ہے۔ انہوں نے کہا کہ ہم نے 2,268 چرچوں کی نشاندہی کی ہے جہاں جمعہ کی پراتھناکی جا رہی ہے۔
پولیس نے گرجا گھروں کے آس پاس کسی بھی مشکوک سرگرمی کی اطلاع دینے کے لیے ایک خصوصی ہاٹ لائن شروع کی ہے۔ پولیس نے کہا کہ 2019 میں ایسٹر اتوار کو ہونے والے خودکش بم دھماکے کے پانچ سال مکمل ہونے کے موقع پر تمام قسم کی احتیاطی تدابیر اختیار کی جا رہی ہیں۔ دریں اثنا، وسطی کولمبو میں مالیگاوٹا کی مجسٹریٹ عدالت نے سابق صدر میتھری پالا سری سینا کو 4 اپریل کو اپنا بیان ریکارڈ کرانے کے لیے عدالت میں پیش ہونے کے لیے سمن جاری کیا ہے۔

قبل ازیں، پولیس کی سی آئی ڈی برانچ نے عدالت کو سری سینا کے 2019 کے ایسٹر سنڈے بم حملے کے دوران عوامی تبصروں کے بارے میں گزشتہ ہفتے ریکارڈ کیے گئے بیان کے بارے میں مطلع کیا تھا۔سری سینا نے کہا تھا کہ وہ جانتے ہیں کہ 2019 میں ایسٹر اتوار کو دھماکے کس نے کیے تھے۔ اس وقت کے صدر سری سینا وزارت دفاع کا چارج سنبھالے ہوئے تھے اور ان پر الزام تھا کہ انہوں نے حملوں کو روکنے میں پہلے سے انٹیلی جنس ہونے کے باوجود کارروائی نہیں کی۔ داعش سے منسلک ایک مقامی جہادی تنظیم کو ان حملوں کا ذمہ دار ٹھہرایا گیا تھا۔