جوہانسبرگ: وزیر اعظم نریندر مودی نے جمعہ کو بھارتی نڑاد ٹیکنالوجی کے صنعت کاروں اور جنوبی افریقہ میں بھارتی برادری کے اراکین سے گفتگو کی اور انہیں بھارت کے ساتھ اپنے تعلقات کو مزید گہرا کرنے کی دعوت دی۔ ایک سوشل میڈیا پوسٹ میں، وزیر اعظم مودی، جو جی۔20 لیڈرز سمٹ میں شرکت کے لیے جوہانسبرگ میں ہیں، نے کہا کہ ان کی بھارتی نڑاد ٹیکنالوجی کے صنعت کاروں سے مفید گفتگو ہوئی۔ انہوں نے فِن ٹیک، سوشل میڈیا پلیٹ فارم، زراعت، تعلیم، صحت کی دیکھ بھال، طبی آلات اور دیگر شعبوں میں ان کے کام کے بارے میں تبادلہ خیال کیا۔

وزیر اعظم نے کہا، میں نے انہیں بھارت کے ساتھ اپنے تعلقات کو مزید گہرا کرنے اور ہمارے لوگوں کے ساتھ مل کر کام کرنے کے لیے کہا۔ وزیر اعظم نے بھارتی برادری کے ان اراکین سے بھی ملاقات کی جو مختلف کمیونٹی تنظیموں کے ساتھ سرگرمی سے کام کر رہے ہیں۔ مودی نے کہا، انہوں نے مختلف مسائل پر اپنے تجربات شیئر کیے اور مختلف شعبوں میں بھارت کی ترقی کی تعریف کی۔

وزیر اعظم نے کہا، میں نے انہیں جنوبی افریقہ کے لوگوں میں یوگا اور آیوروید جیسے طریقوں سمیت بھارتی ثقافت کی مقبولیت کو فروغ دینے کے لیے بھی کہا۔ وزیر اعظم کو چنمیہ مشن کی طرف سے ایک کلش بھی پیش کیا گیا جس میں بھارت اور جنوبی افریقہ کا شری اَنّ (موٹا اناج) تھا۔ انہوں نے کہا، اسے ڈربن کے انپورنا دیوی مندر میں رکھا جائے گا۔ مودی نے جنوبی افریقہ میں ‘بھارت کو جانو’ کوئز کے فاتحین سے بھی ملاقات کی۔ انہوں نے کہا کہ یہ کوئز بھارتی برادری کے اراکین کو بھارت کی تاریخ، ثقافت اور دیگر چیزوں کے بارے میں جاننے کے لیے اتساہت کرتا ہے۔