سنبھل: اتر پردیش کے سنبھل ضلع میں ابھی تک جامع مسجد اور ہریہر مندر کو لے کر تنازعہ چل رہا ہے۔ آئے دن اس معاملے کو لے کر ضلع میں تناؤ کی صورت بنی رہتی ہے۔ اب اسی ضلع میں پولیس انتظامیہ ایک اور مسجد گرانے کی تیاری کر رہی ہے۔
 بتا دیں کہ ضلع کے رایا بزرگ گاؤں میں سرکاری زمین پر بنی ایک غیر قانونی مسجد اور مدرسے کو ہٹانے کی تیاری مکمل ہو گئی ہے۔ نوٹس جاری کرنے کے بعد پولیس اور انتظامی افسران جمعرات کو موقع پر پہنچے، جہاں فورس نے فلیگ مارچ بھی کیا۔ اس معاملے کو لے کر ضلع انتظامیہ کا کہنا ہے کہ یہ مسجد اور مدرسہ تقریبا 10 سال پہلے سرکاری زمین پر بغیر اجازت کے بنایا گیا تھا۔ زمین کا سروے کرنے پر یہ پایا گیا کہ یہ زمین گرام سبھا کی ہے، جس پر کوئی بھی نجی تعمیر جائز نہیں ہے۔
جواب نہیں ملا تو مسمار کیا جائے گا 
وہیں، اس نئے مسجد تنازعے کے معاملے کو لے کر ایس ڈی ایم صدر نے کہا ہے کہ نوٹس جاری ہونے کے بعد بھی کوئی ردعمل نہ ملنے پر اب مسمار کی کارروائی کی جائے گی۔ ہم پرامن طریقے سے کام کریں گے، لیکن قانون کی پابندی کو یقینی بنایا جائے گا۔
بھاری تعداد میں پولیس فورس تعینات
متنازعہ مقام پر کوئی ناخوشگوار واقعہ نہ ہو اس کے لیے پولیس انتظامیہ نے تیاری کر لی ہے اور ہر جگہ پولیس کے جوانوں کو تعینات کر دیا گیا ہے۔ لیکن اب انتظامیہ کے قدم سے راحت ملی ہے۔ ایک دیہاتی نے کہا، سرکاری زمین پر قبضے سے ترقیاتی کام رک جاتے ہیں۔ اچھا ہے کہ کارروائی ہو رہی ہے۔