نئی دہلی:ہندوستان نے ترکی کے صدر کی جموں کشمیر کو لے کر کئے گئے تبصرہ کو مسترد کرتے ہوئے ہفتہ کو دو ٹوک الفاظ میں کہا کہ ترکی کی قیادت کو ہندوستان کے اندرونی معاملات میں مداخلت کرنے کی ضرورت نہیں ہے۔وزارت خارجہ کے ترجمان رویش کمار نے یہاں نامہ نگاروں سے کہا کہ ہندوستان جموں کشمیر کو لے کر کئے گئے تمام تبصرے کو مسترد کرتا ہے جو ہندوستان کا ناقابل تقسیم اور اٹوٹ حصہ ہے۔
پاکستان کے دورے پر گئے ترکی کے صدر رجب طیب اردغان نے جموں و کشمیر کو لے کر پاکستان کے ساتھ یکجہتی کا مظاہرہ کرتے ہوئے تبصرہ کیا اور دونوں ممالک کے مشترکہ بیان میں بھی جموں و کشمیر کے بارے میں ذکر کیا گیا ہے۔
مسٹر کمار نے کہا ہم ترکی کی قیادت سے اپیل کرتے ہیں کہ وہ ہندوستان کے اندرونی معاملات میں مداخلت نہ کریں اور حقائق کو مناسب طریقے سے سمجھیں، جن میں پاکستان کی سرزمین سے ہندوستان اور اس علاقے کے لئے پنپنے والے دہشت گردی کے شدید خطرات بھی شامل ہے۔
اردوغان نے کیا بیان دیا تھا
ترکی کے صدر طیب اردوغان نے جمعہ کو پاکستانی پارلیمنٹ کے مشترکہ اجلاس سے خطاب کیا تھا۔ اس دوران ایردغان نے کشمیر پر پاکستان کے موقف کی حمایت کی تھی۔ انہوں نے کہا تھا کہ کشمیر پاکستان کے لئے جتنا اہم ہے، ان کے ملک کے لئے بھی اتنا ہی اہم ہے۔