انٹرنیشنل ڈیسک: ٹورنٹو پولیس نے کینیڈا کی 25  موسٹ وانٹیڈ ( انتہائی مطلوب ) افراد کی فہرست میں شامل  ہندوستانی  نژاد ایک شخص کو اسلحہ اور گولہ بارود کے ساتھ گرفتار کیا ہے۔ ٹورنٹو پولیس کی جانب سے جاری ایک بیان میں کہا گیا کہ نکولس سنگھ (24) کو جمعہ کے روز گرفتار کر لیا گیا، جو ضمانت کی خلاف ورزی پر پورے کینیڈا میں نافذ وارنٹ کے تحت مطلوب تھا۔ اس میں کہا گیا کہ سنگھ کو ایک آتشیں ہتھیار، ایک میگزین اور گولہ بارود کے ساتھ گرفتار کیا گیا۔
پولیس کا کہنا ہے کہ افسران  بارتھرسٹ اسٹریٹ اور ڈیوپونٹ اسٹریٹ کے علاقے میں تفتیش کر رہے تھے، اسی دوران انہوں نے سنگھ کو ایک گاڑی میں دیکھا۔ اس میں کہا گیا ہے کہ اسے پرسکون طریقے سے گرفتار کر لیا گیا۔ سٹی نیوز کے مطابق، سنگھ پر لگے الزامات میں ممنوعہ آتشیں ہتھیار سے جان بوجھ کر فائرنگ کرنا، مسلح ڈکیتی اور پابندی کے حکم کی خلاف ورزی کرتے ہوئے اسلحہ رکھنا شامل تھا۔ ان معاملات میں اسے پانچ سال، پانچ ماہ اور دس دن کی سزا ملی تھی، جس کے دوران اس نے اپنی ضمانت کی شرائط کی خلاف ورزی کی۔