نئی دہلی/شملہ:  کانگریس کے صدر ملک ارجن کھڑگے نے آج وزیر اعظم نریندر مودی پر سیدھا حملہ کرتے ہوئے کہا کہ وہ ایک تاناشاہ کی طرح کام کرتے ہیں اور اگر ملک کے عوام ان کی تاناشاہی سے بچنا چاہتے ہیں تو  انڈیا  اتحاد کو جتاکر اسے اقتدار سے باہر کرنا ہوگا۔ 
ہماچل پردیش کی راجدھانی شملہ میں ہفتہ کو ایک انتخابی ریلی سے خطاب کرتے ہوئے  مسٹر کھڑگے نے کہا کہ انڈیا اتحاد  لوگوں کے حقوق کے تحفظ کے لیے لڑ رہا ہے۔ مسٹر مودی تاناشاہی   انداز میں حکومت کر رہے ہیں اور انہیں سبق سکھانا ضروری ہے۔ اگر اس الیکشن میں مسٹر مودی کو اقتدار سے نہیں ہٹایا گیا تو ملک میں تاناشاہی  آئے گی۔ انہوں نے کہا کہ یہ الیکشن ہندوستانی اتحاد جیتنے والا ہے اور اپوزیشن جماعتوں کے اتحاد کی جیت میں کوئی شک نہیں ہے۔
مسٹر کھڑگے نے الزام لگایا کہ وزیر اعظم چین سے ڈرتے ہیں اور کچھ نہیں کہہ رہے ہیں ۔ انہوں نے کہا 
 کہ ہندوستان میں جواہر لعل نہرو جی اور اندرا گاندھی جی جیسے وزرائے اعظم رہے ہیں۔ جہاں ایک طرف اندرا گاندھی نے پاکستان کو دو حصوں میں تقسیم کر دیا تھا، وہیں دوسری طرف نریندر مودی چین کے ہندوستانی سرزمین پر قبضہ کرنے کے بعد بھی خاموش ہیں۔ عوام   انہیں سبق سکھائیں گے ۔
مسٹر مودی پر نہ صرف ملک کی سرحدوں بلکہ ملک کی فوج کو بھی کمزور کرنے کا الزام لگاتے ہوئے مسٹر کھڑگے  نے کہا کہ پہلے فوج میں مستقل ملازمت ملتی تھی، پنشن اور دیگر سہولیات میسر تھیں، لیکن مسٹر مودی نے 'اگنی ویر' لا کر سب کچھ ختم کر دیا ہے۔ کانگریس آئین کو بچانے اور نوجوانوں کو روزگار فراہم کرنے کے لیے لڑ رہی ہے، اس لیے یکم جون کو ہاتھ کے نشان کا بٹن دباکر  کانگریس کو بھاری ووٹوں سے جتانا  ہے۔
مسٹر کھڑگے نے کہا  کہ سال 1951 میں ہماچل پردیش کے لوگوں کو سب سے پہلے ووٹ کا حق ملا تھا۔ 1951 میں پنڈت جواہر لال نہرو کی پہلی انتخابی میٹنگ یہاں ہوئی تھی۔ تب انہوں نے کہا تھا  کہ  ہماچل کے لوگوں کو ایسے  امیدواروں کو ووٹ دینا چاہیے،  جو انسانیت کے وقار کو بڑھائے اور جمہوریت کو  مزید مضبوط کرے۔