نئی دہلی: جموں و کشمیر کی سابق وزیر اعلیٰ محبوبہ مفتی کی بیٹی ثنا التجا جاوید شہریت ترمیمی بل پر کابینہ کی مہر لگنے پر ناراضگی ظاہر کرتی ہوئیں نظر آئیں۔انہوں نے کہا کہ یہ اشارہ ہے کہ بی جے پی کی قیادت والی مرکزی حکومت مسلمانوں کے حق میں نہیں ہے۔پی ڈی پی چیف محبوبہ مفتی کے ٹویٹر اکاؤنٹ پر ایک پیغام کے ذریعے اس بل پر پی ڈی پی کا رخ بھی صاف کر دیا گیا۔ 

https://twitter.com/MehboobaMufti/status/1202152480445886465
شہریت ترمیمی بل  پر کابینہ کی مہر لگنے کے کچھ گھنٹوں بعد محبوبہ مفتی کے ٹویٹر اکاؤنٹ پر لکھا گیا،' انڈیا نو کنٹری فار مسلمس'، بتا دیں کہ جموں کشمیر سے دفعہ 370 ہٹانے کے فیصلے کے بعد ہی محبوبہ مفتی کو حراست میں رکھا گیا ہے۔اس کے بعد سے ہی ان کی بیٹی ثنا التجا، محبوبہ مفتی کے تمام سوشل میڈیا اکاؤنٹ ہینڈل کر رہی ہیں۔

قابل ذکر ہے کہ شہریت  ترمیمی بل کو بدھ کو مرکزی کابینہ نے منظوری دے دی، جس کے ذریعہ پاکستان، بنگلہ دیش اور افغانستان سے آئے غیر مسلم پناہ گزینوں جیسے  ہندو، عیسائی، سکھ ، جین بدھسٹ اور پاریوں کو شہریت دی جا سکے گی۔لوک سبھا کے گزشتہ مدت کے دوران غیر مؤثر ہو چکے اس بل کو اگلے ہفتے پارلیمنٹ میں پیش کئے جانے کا امکان ہے۔ چونکہ اس بل میں مسلمانوں کو شامل نہیں کیا گیا ہے، تو اپوزیشن نے بل کو بھارتی آئین میں موجود سیکولر اصولوں کے خلاف قرار دیتے ہوئے اس کی تنقید کی ہے۔