جموں اور کشمیر کی سابق وزیر اعلیٰ اور پیپلز ڈیموکریٹک پارٹی (پی ڈی پی) کی صدر محبوبہ مفتی نے قومی سلامتی کے مشیر (این ایس اے)اجیت ڈوبھال کے جموں و کشمیر کے دورے پر طنز کسا ہے۔ایک ٹویٹ میں محبوبہ مفتی نے کہا کہ اجیت ڈوبھال کے پچھلے دورے میں فوٹو سیشن کے دوران مینو میں بریانی تھی ، کیا اس بار حلیم ہے؟
غور طلب ہے کہ جموں کشمیر کے خصوصی ریاست کے درجہ کو ختم کے کئے جانے کے بعد ڈوبھال بدھ کو حالات کا جائزہ لینے اور سرکاری منصوبوں کے فہم نفاذ کے لئے آگے کی حکمت عملی طے کرنے کے مقصد سے ایک بار پھر وادی کشمیر پہنچے ہیں۔یہاںڈوبھال جموں و کشمیر کے موجودہ حالات کے بارے میں جائزہ لیں گے اور وادی میںسکیورٹی کے نظام پر تادلہ خیال کریں گے۔
معلومات کے مطابق ڈوبھال وادی کے اہم سکیوررٹی حکام سے ملاقات کریں گے اور جموں و کشمیر میں سیکورٹی اور ترقی سے متعلق سرگرمیوں کا جائزہ لیں گے۔ڈوبھال کا یہ دورہ جموں و کشمیر کے مرکز کے زیر انتظام صوبہ بننے سے پہلے ہوا ہے۔قابل ذکر ہے کہ کہ 31 اکتوبر کو جموں و کشمیر دو مرکز کے زیر انتظام علاقوں(جموں و کشمیر اور لداخ) میں تقسیم ہو جائے گا۔
وادی میں اپنے پہلے دورے کے دوران ڈوبھال 11 دنوں تک وادی میں ہی ٹھہرے رہے اور دہشت گردی متاثر جنوبی کشمیر کے شوپیاں اور سرینگر کے پرانے علاقوں کا دورہ کیا تھا۔ڈوبھال آرٹیکل 370 کے ختم کئے جانے کے بعد ہی تمام سیکورٹی ایجنسیوں کے درمیان ہم آہنگی کو یقینی بنانے اور کنٹرول لائن پر صورتحال پر مسلسل نظر بنائے ہوئے ہیں۔