نیشنل ڈیسک: مشرقِ وسطی میں جاری جنگ کے درمیان عراق میں امریکی فوج کا طیارہ کے سی 135 اسٹریٹو ٹینکر(KC-135 Stratotanker)  حادثے کا شکار ہو گیا۔ اس واقعے کی تصدیق امریکہ کی مرکزی فوجی کمان نے جمعرات کو کی۔ حکام نے بتایا کہ یہ حادثہ کسی دشمن کے حملے یا اپنی ہی فوج کی فائرنگ کی وجہ سے نہیں ہوا ہے۔
مرکزی فوجی کمان کے مطابق واقعے کے وقت دو کے سی 135 اسٹریٹو ٹینکر طیارے ایک مشن میں شامل تھے۔ ان میں سے ایک طیارہ محفوظ طور پر اتر گیا جبکہ دوسرا مغربی عراق میں گر کر تباہ ہو گیا۔ اس وقت بچا ؤکا عمل جاری ہے۔
آپریشن ایپک فیوری (Epic Fury) کے دوران حادثہ
مرکزی فوجی کمان نے اپنے بیان میں کہا کہ یہ حادثہ آپریشن ایپک فیوری کے دوران پیش آیا۔ کمان نے بتایا کہ یہ واقعہ دوستانہ فضائی حدود میں پیش آیا تھا اور اس کا کسی قسم کی گولی باری یا میزائل حملے سے کوئی تعلق نہیں ہے۔ تاہم ابھی تک یہ واضح نہیں ہو سکا ہے کہ حادثے کا شکار ہونے والے طیارے کے پائلٹ اور دیگر عملے کے ارکان محفوظ ہیں یا نہیں۔
امریکہ اور ایران کی جنگ میں کئی فوجی زخمی
قابلِ ذکر ہے کہ 28 فروری سے امریکہ اور ایران کے درمیان لڑائی جاری ہے جس میں اسرائیل بھی شامل ہے۔ ایک خبر رساں ادارے کی رپورٹ کے مطابق اس جنگ میں اب تک سات امریکی فوجی ہلاک ہو چکے ہیں جبکہ تقریباً 150 امریکی فوجی زخمی ہوئے ہیں۔
پہلے بھی ہوا تھا فرینڈلی فائر (اپنی ہی فائرنگ ) کا حادثہ 
جنگ کے ابتدائی مرحلے میں ایک اور بڑا حادثہ پیش آیا تھا جب کویت کی فوج نے غلطی سے امریکی ایف 15 ای اسٹرائیک ایگل (F-15E Strike Eagle)  لڑاکا طیاروں کو مار گرایا تھا۔ یہ واقعہ اپنی ہی فوج کی فائرنگ کا معاملہ تھا جو اس وقت پیش آیا جب ایرانی طیاروں، بیلسٹک میزائلوں اور ڈرون حملوں کے درمیان شدید لڑائی جاری تھی۔ تاہم ان طیاروں میں سوار تمام چھ ارکان محفوظ طریقے سے باہر نکلنے میں کامیاب ہو گئے تھے۔
جنگ میں تباہ ہونے والے امریکی طیاروں کی تعداد میں اضافہ
حال ہی میں کے سی 135  ٹینکر طیارے کے نقصان کے بعد اس جنگ کے دوران تباہ ہونے والے امریکی فوجی طیاروں کی تعداد کم از کم چار ہو گئی ہے۔ یہ واقعہ ظاہر کرتا ہے کہ مشرقِ وسطی میں جاری لڑائی کتنی سنگین ہوتی جا رہی ہے اور اس میں دونوں فریقوں کو فوجی نقصان اٹھانا پڑ رہا ہے۔
60 برس سے امریکی فضائیہ کی بنیاد ہے کے سی 135 
کے سی 135 اسٹریٹو ٹینکر پچھلے چھ دہائیوں سے زیادہ عرصے سے امریکی فضائیہ کے بیڑے کا اہم حصہ رہا ہے۔ اس طیارے کا بنیادی کام فضا میں ہی دوسرے فوجی طیاروں کو ایندھن فراہم کرنا ہوتا ہے جس سے ان کی پرواز کی صلاحیت اور کارروائی کا وقت بڑھ جاتا ہے۔ عام طور پر کے سی135  طیارے میں تین افراد پر مشتمل عملہ ہوتا ہے۔ 
پائلٹ، معاون پائلٹ اور ایک بوم آپریٹر جو دوسرے طیاروں میں ایندھن منتقل کرنے والے آلے کو قابو میں رکھتا ہے۔ بعض مشنوں میں اس میں ایک راستہ بتانے والا افسر بھی شامل کیا جاتا ہے۔ امریکی فضائیہ کے مطابق مشن کی ضرورت کے مطابق یہ طیارہ سینتیس افراد تک کو لے جانے کی صلاحیت رکھتا ہے۔