ممبئی: ویب سیریز تانڈو کے بارے میں تنازعہ بڑھتا ہی جارہا ہے۔ ملک کے کئی حصوں میں ، لوگ اس سلسلہ کے پروڈیوسر اور ہدایتکار علی عباس ظفر ، اداکار سیف علی خان سمیت متعدد افراد کے خلاف احتجاج کر رہے ہیں۔ اس  سیریز  وابستہ تمام افراد کے خلاف بھی متعدد مقدمات درج کئے  گئے ہیں۔  وہیں اب  مہاراشٹرکرنی سینا نے بھی اس  سیریز کو لیکر متنازعہ بیان دیا ہے۔

مہاراشٹرکرنی سینا کے چیف ، اجے  سینگر نے کہا  کہ' جس نے بھی ہندؤوں کے دیوی دیوتاؤں کی توہین کی ہے ، اس کی زبان کاٹنے والوں کو ایک کروڑ روپے کا انعام دیا جائے گا۔ بھلے ہی  تانڈو کے  ڈائریکٹروں  نے سب سے معافی مانگی ہے لیکن یہ کافی نہیں ہے اور  اس کو قبول نہیں کیا جائے گا'۔

جے پور میں کرنی سینا کا انوکھا مظاہرہ
سیریز کے خلاف  کرنی سینا نے جے پور میں  انوکھا مظاہرہ کیا ۔کرنی سینا کی ویمن ونگ نے جہاں پر  مظاہرہ کیا ، وہیں  خواتین نے    گدھوں کے چہرے پر ویب سیریز کے اداکار ، اداکارہ اور ہدایتکار کا پوسٹر لگا کر ان کو  گلاب جامن  کھلائے ۔

اس کے ساتھ ہی انہوں نے یہ پیغام دیا کہ اب سدھر جاؤ، ابھی تو مٹھائی کھلا رہے ہیں  ،وہ دن زیادہ دور نہیں جب یہ کام کرنے والے بالی وڈ کے لوگوں کو جوتے  مارے جائیں گے۔