روم:پچھلے کئی دنوں سے اٹلی بھر میں جاری خراب موسم، تیز ہوائیں اور شدید بارش لوگوں کی روزمرہ زندگی کو بڑے پیمانے پر متاثر کر رہی ہے۔ اٹلی کے سسلی، کیلابریا، سردینیا اور لازیو صوبے کے کئی علاقوں میں جہاں بارش کے پانی کی وجہ سے لوگوں کا جینا مشکل ہو گیا ہے وہیں سسلی اور لازیو صوبے کے کچھ علاقوں میں زمین کھسکنے سے لوگوں کو بڑے پیمانے پر مالی نقصان ہونے کے ساتھ ایک شخص کی موت اور کئی لوگوں کے زخمی ہونے کے واقعات بھی سامنے آ رہے ہیں۔
اطلاعات کے مطابق خراب موسم کی وجہ سے سسلی میں حالات پہلے ہی خراب تھے اور اب جنوبی اٹلی کے کیلابریا صوبے میں صورتحال نازک بنی ہوئی ہے۔ گزشتہ رات کوسینزا کے تیرینیئن ساحل پر اور آرون، مرکونڈے اور میڈالینا دریاوں میں بارش کی وجہ سے پانی اوور فلو ہو گیا ہے۔ یہاں کے مقامی میئر نے حکومت سے علاقے میں قدرتی آفت کی صورتحال کا اعلان کرنے کی درخواست کی ہے۔ اسی طرح لازیو صوبے کے فیومچینو (روم) میونسپلٹی میں شدید بارش اور تیز ہواوں نے لوگوں کے گھروں کو کافی نقصان پہنچایا۔ فارمیلو علاقے میں بارش کی وجہ سے ایک تین منزلہ عمارت زمین کھسکنے کے باعث نیچے دھنس گئی جس کے نتیجے میں ایک 58 سالہ شخص کی موت ہو گئی۔ وہاں دیگر عمارت میں رہنے والے کئی لوگ شدید زخمی ہو گئے جو ایک ہسپتال میں زیر علاج ہیں۔

اٹلی اور یورپ میں موسم کے حوالے سے پیش آنے والے واقعات کے بارے میں سائنس دانوں کا کہنا ہے کہ گرین ہاوس گیسوں کے اخراج کی وجہ سے پیدا ہونے والا ماحولیاتی بحران گرم ہواوں، خشک سالی، تیز طوفان اور سیلاب جیسی انتہائی موسمی واقعات کو بار بار اور شدید بنا رہا ہے۔ اگرچہ گرین ہاوس گیسوں کے بہت سے ذرائع ہیں جو عالمی حدت کا سبب بن رہے ہیں پھر بھی بنیادی وجہ تیل، گیس اور کوئلے جیسے فوسل ایندھن جلانا ہے جن کی فروخت دنیا کے توانائی کے بڑے اداروں کے لیے بھاری منافع پیدا کرتی ہے لیکن انسانی زندگی کے لیے خطرہ بنتی نظر آ رہی ہے۔