کولمبو: چین کو بڑا جھٹکا دیتے ہوئے سری لنکا نے ہمبنٹوٹا میں مٹالا راجا پاکسے انٹرنیشنل ایئرپورٹ کے انتظام کی ذمہ داری بھارت کو سونپ دی ہے اور اس میں روسی کمپنی بھی مدد کرے گی۔ سری لنکا کی حکومت کی کابینہ نے جمعہ کو یہ فیصلہ کیا ہے۔ حکومتی ترجمان نے جمعہ کو یہ اطلاع دی۔ یہ ہوائی اڈہ 209 ملین امریکی ڈالر کی لاگت سے تعمیر کیا گیا تھا اور کبھی پروازوں کی کمی کی وجہ سے اسے 'دنیا کا سب سے ویران ہوائی اڈہ' قرار دیا گیا تھا۔ حکومتی ترجمان اور وزیر بندولا گناوردینا نے صحافیوں کو بتایا کہ سری لنکا کی کابینہ نے 9 جنوری کو ممکنہ فریقین سے دلچسپی کے اظہار کو مدعو کرنے کی منظوری دی تھی۔

سری لنکا کے ساحلی شہر ہمبنٹوٹا کے قریب واقع یہ ہوائی اڈہ چین نے تعمیر کیا ہے۔ سری لنکا کی حکومت نے اسے 99 سال کے لیے چین کو لیز پر دیا ہواہے۔ ایسے میں کسی ہندوستانی کمپنی کے لیے ضروری ہے کہ وہ اس بندرگاہ کے قریب واقع ہوائی اڈے کا انتظام حاصل کرے۔ انہوں بتایا کہ اس کے بعد، پانچ تجاویز موصول ہوئیں اور کابینہ کی طرف سے مقرر کردہ مشاورتی کمیٹی نے بھارت کی شوریہ ایروناٹکس (پرائیویٹ) لمیٹڈ اور روس کے ایئرپورٹس آف ریجنز مینجمنٹ کمپنی کو 30 سال کے لیے انتظامی معاہدہ دینے کا فیصلہ کیا۔ گناوردینا نے کہا کہ کابینہ نے شہری ہوا بازی اور ہوائی اڈے کی خدمات کے وزیر کی طرف سے پیش کردہ تجویز کو منظوری دے دی۔مٹالا ایئرپورٹ کا نام سابق صدر مہندا راجا پاکسے کے نام پر رکھا گیا ہے۔

مہندا راجا پاکسے کے تقریباً ایک دہائی طویل دور حکومت میں بہت سے بڑے بنیادی ڈھانچے کے منصوبے شروع کیے گئے، جن میں سے یہ ایک ہے۔ چین نے اس منصوبے کے لیے اعلیٰ شرح سود پر تجارتی قرضے دیے۔ اس منصوبے پر 209 ملین امریکی ڈالر خرچ ہوئے جن میں سے 190 ملین امریکی ڈالر چین کے ایگزم بینک نے بلند شرح سود پر فراہم کیے تھے۔ سری لنکا کی حکومت 2016 سے اس ہوائی اڈے کے انتظام کے لیے تجارتی پارٹنر کی تلاش کر رہی ہے کیونکہ اسے بھاری نقصان اٹھانا پڑ رہا تھا۔