روم:بھارت کا 77 واں یومِ جمہوریہ دنیا بھر میں مقیم بھارتیوں نے نہایت شان و شوکت کے ساتھ منایا۔بھارتی سفارت خانہ روم میں بھی سفیر معزز محترمہ وانی راو کی قیادت میں بھارتی برادری نے مل جل کر یومِ جمہوریہ کی تقریب منائی۔بھارت کے قومی پرچم ترنگا کو لہرانے کی رسم محترمہ وانی راو نے ادا کرنے کے بعد صدرِ جمہوریہ دروپدی مرمو کا قوم کے نام پیغام پڑھ کر سنایا۔

اس موقع پر محترمہ وانی راو نے یومِ جمہوریہ کی تقریب میں موجود بھارت سے محبت کرنے والوں سے ملک کی ترقی کے لیے تعاون کرنے کی اپیل کرتے ہوئے کہا کہ بھارت دنیا میں ایک منفرد مقام رکھتا ہے، آو ہم سب اسے مزید آگے لے کر چلیں۔آپ سب کو مبارک ہو کہ آپ بھارت کے 77 ویں یومِ جمہوریہ میں شریک ہو کر غیر ملکی سرزمین پر ملک کا نام روشن کر رہے ہیں۔

اٹلی میں بھارتی بچے تعلیمی میدان میں بھرپور طریقے سے بھارت کا نام روشن کر رہے ہیں جو کہ قابلِ تعریف عمل ہے۔انہوں نے مزید کہا کہ بھارتی سفارت خانہ روم ہمیشہ ہی برادری کی خدمت میں مصروف رہتا ہے۔اس موقع پر بڑی تعداد میں بھارتیوں نے شرکت کی جن کا سفارت خانے کے عملے کی جانب سے پرتپاک استقبال کیا گیا۔اس موقع پر آئے ہوئے مہمانوں نے بھارتی کھانوں سے بھی لطف اٹھایا۔