انٹرنیشنل ڈیسک: ہندوستان اور کینیڈا اپنے تعلقات کو دوبارہ مضبوط بنانے کے لیے اگلے ہفتے اہم مذاکرات کرنے جا رہے ہیں۔ دونوں ممالک کے درمیان تعلقات میں بہتری کے لیے گزشتہ ماہ طے پانے والے معاہدے کے بعد یہ پہلی ملاقات ہوگی۔ مذاکرات میں سلامتی کے امور اور سفارتی تعلقات کو بہتر بنانے پر توجہ دی جائے گی۔ کینیڈا کے اسسٹنٹ ڈپٹی منسٹر آف انڈو پیسیفک افیئر ویلڈن ایپ (Weldon Epp  ) اگلے ہفتے نئی دہلی آئیں گے۔ وہ ملائیشیا میں آسیان سے متعلق میٹنگ کے بعد ہندوستان آئیں گے اور یہاں ہندوستان کے ایڈیشنل سکریٹری(امریکہ) کے ناگراج نائیڈو سے ملاقات کریں گے۔
گزشتہ ماہ کینیڈا کے نئے وزیر اعظم مارک کارنی اور ہندوستانی وزیر اعظم نریندر مودی کی کینیڈین راکیز میں G7 سربراہی اجلاس کے دوران ملاقات ہوئی تھی۔ اس ملاقات میں دونوں ممالک نے اپنے باہمی تعلقات کو دوبارہ پٹری پر لانے کے لیے 'متوازن اور تعمیری اقدامات' کرنے پر اتفاق کیا۔ ویلڈن ایپ اس معاہدے کے بعد ہندوستان کا دورہ کرنے والے کینیڈا کے پہلے سینئر عہدیدار ہوں گے۔ مذاکرات میں دونوں ممالک کے درمیان سیکورٹی ایجنسیوں کے درمیان تعاون بڑھانے، باہمی انٹیلی جنس شیئرنگ اور امن و امان سے متعلق امور پر تبادلہ خیال کیا جائے گا۔
اس کے ساتھ ہی دونوں ممالک انسداد دہشت گردی ورکنگ گروپ کا اجلاس دوبارہ شروع کرنے پر بھی غور کریں گے جو گزشتہ دو سال سے بند ہے۔ ہندوستان اپنی طرف سے ایک بار پھر کینیڈا میں سرگرم خالصتانی عناصر اور ان کی مجرمانہ سرگرمیوں پر تشویش کا اظہار کرے گا۔ دونوں ممالک ایک دوسرے کے دارالحکومت میں نئے ہائی کمشنر بھی تعینات کرنے جا رہے ہیں۔ اسپین میں ہندوستان کے سفیر دنیش پٹنائک کو اوٹاوا میں ہندوستان کا نیا ہائی کمشنر بنایا جائے گا۔وہیں ، کرسٹوفر کوٹر، جو ابھی وقت اسرائیل میں کینیڈا کے چارج ڈی افیئرز ہیں، کینیڈا سے ہندوستان میں نئے ہائی کمشنر ہوں گے۔ ان تقرریوں کا باقاعدہ اعلان جلد کیا جائے گا اور توقع ہے کہ نئی تعیناتی اگست کے آخر تک مکمل ہو جائے گی۔
تعلقات کیوں خراب ہوئے؟
ہندوستان اور کینیڈا کے تعلقات میں اس وقت دراڑ پیدا ہوئی جب سابق کینیڈا کے وزیر اعظم جسٹن ٹروڈو نے ستمبر 2023 میں الزام لگایا کہ خالصتانی علیحدگی پسند ہردیپ سنگھ نجر کے قتل میں ہندوستانی ایجنسیاں ملوث ہیں۔ ہندوستان نے اسے مضحکہ خیز قرار دیا اور اس کے بعد دونوں ملکوں نے باہمی تجارتی مذاکرات روک دیے، درجنوں سفارت کاروں کو ملک سے نکال دیا اور تعلقات کافی خراب ہوگئے۔ اب پی ایم مودی اور پی ایم کارنی کی ملاقات کے بعد تعلقات کو نئے سرے سے شروع کرنے کی کوششیں کی جارہی ہیں۔ کینیڈا کی وزیر خارجہ انیتا آنند نے اسے دو طرفہ تعلقات کے لیے ایک "اہم قدم" قرار دیا ہے۔