انٹر نیشنل ڈیسک : مغربی ایشیا میں بڑھتی ہوئی فوجی کشیدگی کے درمیان اب خلیج کے وہ شہر بھی خود کو غیر محفوظ محسوس کرنے لگے ہیں جو پہلے محفوظ سمجھے جاتے تھے۔ دبئی میں ہونے والے ڈرون اور میزائل حملوں نے وہاں مقیم ہندوستانی تارکین وطن کے درمیان خوف پیدا کر دیا ہے۔ ہانگ کانگ میں مقیم ہندوستانی کاروباری شخصیت پرکاش ددلانی نے اپنے فیملی چیٹس (خاندان کے ساتھ میسیج) کے گروپ کے کچھ  اسکرین شاٹس شیئر کیے ہیں جو اس خوفناک صورت حال کی گواہی دے رہے ہیں۔
پرکاش ددلانی نے خاندان کے ساتھ گفتگو کے کچھ حصے شیئر کیے
پرکاش ددلانی نے سوشل میڈیا پر اپنے خاندان کی گفتگو کا حصہ شیئر کرتے ہوئے بتایا کہ دبئی میں موجود ان کی والدہ وہاں کے حالات سے بہت خوف زدہ ہیں۔ ان کی والدہ نے پیغام میں لکھا کہ اب ڈر لگ رہا ہے۔ اس کا کوئی انجام نظر نہیں آ رہا۔ ددلانی نے اپنی تحریر میں گہرا دکھ ظاہر کرتے ہوئے لکھا کہ دبئی کو دنیا کے محفوظ ترین شہروں میں شمار کیا جاتا ہے۔ میں نے کبھی نہیں سوچا تھا کہ ایک دن میرے فیملی چیٹس ( خاندانی پیغامات ) میں ایسی باتیں ہوں گی۔ 
اہم مقامات بھی نشانے پر آئے
اطلاعات کے مطابق ان حملوں میں دبئی کے نمایاں مقامات کو نشانہ بنایا گیا۔ حملوں کے باعث برج العرب ہوٹل اور جبل علی بندرگاہ پر آگ لگنے کی خبریں بھی سامنے آئی ہیں۔ دبئی کے ذرائع ابلاغ کے دفتر کے ایک سرکاری بیان کے مطابق روکے گئے ڈرونوں کا ملبہ دو گھروں پر گرنے سے دو افراد زخمی ہوئے ہیں۔
عمان اور قطر بھی زد میں آ گئے
ایران نے پہلے امریکی ٹھکانوں کو نشانہ بنانے کی بات کہی تھی لیکن اب حملے خلیج کے دیگر شہروں تک پھیل گئے ہیں۔ مسلسل دوسرے دن دبئی اور قطر کے دارالحکومت دوحہ میں زور دار دھماکوں کی آوازیں سنی گئیں۔ پہلی بار عمان میں بھی حملے کی اطلاعات ملی ہیں۔ یہ کارروائی امریکہ اور اسرائیل کی جانب سے کیے گئے حملوں کے جواب میں ایران کی جوابی کارروائی بتائی جا رہی ہے۔
 سوشل میڈیا پر حمایت اور تشویش کا اظہار
ددلانی کی اس تحریر کو اب تک 42 ہزار سے زیادہ افراد دیکھ چکے ہیں۔ تبصروں میں لوگ وہاں پھنسے شہریوں کی حفاظت کے لیے دعا کر رہے ہیں۔ ایک صارف نے لکھا کہ امیر لوگوں کے لیے محفوظ پناہ گاہ سمجھے جانے والے دبئی میں غیر یقینی صورت حال پیدا کر کے امریکہ پر دباؤ ڈالنے کی کوشش کی جا رہی ہے۔ اس جغرافیائی سیاسی کشیدگی کی قیمت عام لوگ ادا کر رہے ہیں۔ ایک اور صارف نے تشویش ظاہر کرتے ہوئے کہا کہ میری سب سے قریبی سہیلی بھی وہاں ہے۔ میں اس کے لیے بہت فکر مند ہوں۔