نیو یارک: امریکہ میں بیوی کے قتل کے الزام میں فرار ایک ہندوستانی شہری کی تلاش تیز کرتے ہوئے وفاقی تحقیقاتی ادارے نے اطلاع دینے والے کے لیے انعام بڑھا کر دس لاکھ امریکی ڈالر کر دیا ہے۔ ادارے کے مطابق بھدریش کمار چیتن بھائی پٹیل(35 ) پر الزام ہے کہ اس نے بارہ اپریل 2015 کو ہینوور،  میری لینڈ ، امریکہ  (Hanover, Maryland, USA) میں اپنی بیوی پالک پٹیل (21 ) سال کو چاقو کے کئی وار کر کے قتل کر دیا تھا۔ یہ واقعہ اس دکان میں پیش آیا تھا جہاں دونوں کام کرتے تھے۔ تفتیشی اداروں کے مطابق رات دیر گئے دکان کے پیچھے بنے کمرے میں ملزم نے اپنی بیوی پر کئی بار چاقو سے حملہ کیا۔ واردات کے بعد وہ دکان کے پچھلے دروازے سے فرار ہو گیا۔

تحقیقات کرنے والوں کا ماننا ہے کہ ملزم کو آخری بار نیوارک نیو جرسی کے علاقے میں دیکھا گیا تھا۔ اس کے بعد سے وہ مسلسل فرار ہے۔ بھدریش کمار پٹیل کا نام وفاقی تحقیقاتی ادارے کی دس انتہائی مطلوب مجرموں کی فہرست میں بھی شامل ہے۔ ادارے نے منگل کو اعلان کیا کہ ملزم کی گرفتاری میں مدد کرنے والے کو اب دس لاکھ ڈالر کا انعام دیا جائے گا۔ ابتدا میں ادارے نے اس معاملے میں اطلاع دینے پر ایک لاکھ ڈالر کا انعام مقرر کیا تھا۔ بعد میں اسے بڑھا کر ڈھائی لاکھ ڈالر کر دیا گیا تھا اور اب اسے بڑھا کر دس لاکھ ڈالر کر دیا گیا ہے۔ وفاقی تحقیقاتی ادارے کا کہنا ہے کہ ملزم کی گرفتاری کے لیے بین الاقوامی سطح پر بھی تلاش جاری ہے۔