واشنگٹن: امریکہ کے دائیں بازو کے کارکن اور صدر ڈونالڈ ٹرمپ کے قریبی ساتھی چارلی کرک کے قتل نے پورے امریکہ میں ہلچل مچا دی تھی۔ 10 ستمبر 2025 کو یوٹا یونیورسٹی میں منعقدہ ایک عوامی مباحثے کے دوران حملہ آور نے چارلی کرک کے گلے پر گولی مار دی، جس سے ان کی موت ہوگئی۔ اس قتل نے نہ صرف امریکہ میں سیاسی اور سماجی ماحول کو جھنجھوڑ کر رکھ دیا بلکہ دائیں بازو اور لبرل گروہوں کے درمیان کشیدگی بھی بڑھا دی۔
 واقعے کے چند ہی دنوں بعد پولیس نے مشتبہ حملہ آور ٹائلر رابنسن کو گرفتار کر لیا۔ حکام کے مطابق، رابنسن نے کرک پر "نفرت پھیلانے" کا الزام لگاتے ہوئے حملے کو جائز ٹھہرایا۔ تفتیش میں یہ بھی معلوم ہوا کہ رابنسن کو خوف تھا کہ پولیس اسے انکاؤنٹر میں مار سکتی ہے۔

https://x.com/realDailyWire/status/1969893178393206823
حال ہی میں چارلی کرک کی بیوہ ایرکا کرک نے ایک مذہبی پروگرام میں اپنے شوہر کی یاد میں تقریر کرتے ہوئے حیران کن بیان دیا۔ انہوں نے کہا کہ وہ اپنے شوہر کے قاتل کو معاف کرتی ہیں۔ ایرکا نے یہ بھی کہا کہ ان کے شوہر چارلی بھی ان نوجوانوں کی مدد کرنا چاہتے تھے جو غلط راستے پر بھٹکے ہوئے ہوں-  بالکل ویسے ہی جیسے قاتل نے ان کی جان لی۔ انہوں نے اپنی تقریر میں یسوع مسیح اور چارلی کی تعلیمات کا حوالہ دیتے ہوئے کہا کہ نفرت کا جواب نفرت سے نہیں دینا چاہیے۔ اس پروگرام میں تقریبا 60,000 لوگ موجود تھے اور امریکی صدر ڈونالڈ ٹرمپ نے بھی اس میں حصہ لیا۔
ایرکا کرک نے جذباتی ہو کر کہا کہ میں اس نوجوان کو معاف کرتی ہوں۔ میرے شوہر چارلی بھی یہی کرتے۔ نفرت کا جواب نفرت سے نہیں دینا چاہیے۔ان کا یہ بیان نہ صرف ذاتی معافی کی علامت ہے بلکہ امریکہ میں بڑھتے ہوئے سیاسی اور سماجی تقسیم کے درمیان امن اور برداشت کا پیغام بھی دیتا ہے۔ چارلی کرک کا قتل اور اس کے بعد کے واقعات نے امریکہ میں سیاسی پولرائزیشن، تشدد اور سوشل میڈیا کے اثرات کو بھی نمایاں کیا ہے۔ اس کیس میں قاتل کی گرفتاری اور ایرکا کرک کے معاف کرنے والے رویے کو ملک اور دنیا کے لیے ایک بڑی سبق کے طور پر دیکھا جا رہا ہے۔