لندن: برطانیہ کی جنگ  کے دوران اڑان بھرنے والے آخری زندہ بچ جانے والے پائلٹ جان "پیڈی" ہیمنگوے 105 سال کی عمر میں انتقال کر گئے۔ برطانیہ کی رائل ایئر فورس نے کہا کہ ہیمنگوے کا انتقال پیر کو ڈبلن میں اپنے گھر پر ہوا۔ برطانیہ کی جنگ دوسری جنگ عظیم کی ایک فوجی مہم تھی۔ یہ ایک جنگ تھی جو بنیادی طور پر 1940 میں جنوبی انگلینڈ میں لڑی گئی تھی۔ اس  میں  رائل ایئر فورس (RAF) اور رائل نیوی کی فلیٹ ایئر آرم (FAA)  نے نازی جرمنی کی فضائیہ لٹف وافے( Luftwaffe )کے حملوں سے برطانیہ کا دفاع کیا تھا ۔
یہ پہلا بڑا فوجی آپریشن تھا جو مکمل طور پر فضائی افواج کے ذریعے لڑا گیا۔ ہیمنگوے کی عمر صرف 20 سال تھی جب وہ اور اس کے رائل ایئر فورس کے ساتھی نازی طیاروں کی لہروں سے لڑنے کے لیے آسمانوں پر گئے۔ نازی طیارے 1940 کے موسم گرما اور خزاں کے دوران برطانیہ کو زیر کرنے کے لیے انتھک حملے کر رہے تھے۔ رائل ایئر فورس (RAF) کے مطابق، اگست 1940 میں جرمن ہوائی جہاز کے ساتھ ایک فضائی لڑائی کے دوران، ہیمنگوے کو دو بار اپنے ہریکین لڑاکا طیارے سے باہر نکلنے پر مجبور ہونا پڑا تھا ۔ انہیں 1941 میں بہادری کے لیے ممتاز فلائنگ کراس سے نوازا گیا۔