اسلام آباد: پاکستان کے صوبہ بلوچستان میں اتوار کو 5.5 شدت کا زلزلہ آیا جس میں کم از کم تین افراد زخمی ہو گئے۔ یہ اطلاع میڈیا رپورٹس سے ملی۔ 'ایکسپریس ٹریبیون' اخبار کی خبر کے مطابق ملک کے زلزلہ پیما مرکز نے بتایا کہ زلزلے کا مرکز موسیٰ خیل ضلع کے قریب 28 کلومیٹر کی گہرائی میں تھا۔ زلزلے سے دو مکان تباہ جبکہ تین کو جزوی نقصان پہنچا۔ امدادی کارکنوں کے حوالے سے خبر میں کہا گیا ہے کہ مکان گرنے سے تین افراد زخمی ہوئے ہیں۔
پراونشل ڈیزاسٹر مینجمنٹ اتھارٹی (PDMA) کے ترجمان نے بتایا کہ متاثرہ علاقے میں امدادی کارروائیاں شروع کر دی گئی ہیں۔ انہوں نے کہا کہ پی ڈی ایم اے کی ٹیمیں نقصان کا جائزہ لے رہی ہیں اور زلزلے سے بے گھر ہونے والے لوگوں میں خیمے تقسیم کر رہی ہیں۔ اس سے قبل 'جیو نیوز' میں ایک خبر میں کہا گیا تھا کہ صوبے کے بارکھان شہر کے قریب 5.3 شدت کا زلزلہ آیا۔ انہوں نے کہا کہ کسی جانی یا مالی نقصان کی اطلاع نہیں ہے۔ امریکی جیولوجیکل سروے کے مطابق پاکستان میں مقامی وقت کے مطابق صبح ساڑھے تین بجے زلزلہ آیا، اس کا مرکز بارکھان سے تقریباً 60 کلومیٹر شمال مشرق میں تھا۔