بہرائچ نیوز: اتر پردیش کے بہرائچ ضلع میں بھیڑیوں کے مسلسل حملوں سے بچوں کی ہلاکت کے واقعات پر وزیر اعلی یوگی آدتیہ ناتھ نے سخت قدم اٹھائے ہیں۔ گزشتہ چند دنوں میں بھیڑیوں کے حملوں میں بارہ بچوں کی جان جا چکی ہے، جس سے پورے علاقے میں خوف و ہراس کا ماحول ہے۔ اس سنگین صورتحال کو دیکھتے ہوئے وزیر اعلیٰ نے محکمہ جنگلات کی کارکردگی پر ناراضگی ظاہر کی تھی، جس کے بعد حکومت نے بڑی انتظامی کارروائی کی ہے۔
بہرائچ کے ڈی ایف او ہٹائے گئے، نیا افسر تعینات
جنگلات کے وزیر ارون سکسینہ کی ہدایت پر بہرائچ کے ڈویژنل فاریسٹ آفیسر رام سنگھ یادو کو ان کے عہدے سے ہٹا دیا گیا ہے۔ انہیں ہیڈکوارٹر سے اٹیچ کر دیا گیا ہے۔ وہیں ایٹا کے ڈی ایف او سندریشا کو نیا ڈی ایف او بہرائچ مقرر کیا گیا ہے۔ حکومت کا کہنا ہے کہ اس تبدیلی سے بچا ؤ اور نگرانی کی مہم کو مزید تیز کیا جائے گا، تاکہ حالات پر بہتر قابو پایا جا سکے۔
سرچ آپریشن میں ساتواں بھیڑیا ہلاک
اسی دوران محکمہ جنگلات کو مہم کے دوران ایک اور کامیابی ملی ہے۔ قیصرگنج جنگلاتی علاقے کے برجاپکریا گاؤں میں جاری سرچ آپریشن کے دوران ساتویں بھیڑیے کی لاش برآمد کی گئی ہے۔ محکمہ جنگلات کی ٹیم نے ڈرون کیمرے کی مدد سے بھیڑیے کی جگہ کا پتہ لگایا تھا۔ گھیراؤ کے دوران بھیڑیا گاؤں کی طرف سے دریا کی جانب بھاگنے لگا۔ اسے پکڑنا ممکن نہیں ہو سکا، اس لیے شوٹر کو فائر کرنا پڑا، جس سے بھیڑیے کی موقع پر ہی موت ہو گئی
بالغ نر بھیڑیا، پوسٹ مارٹم کرایا گیا
جنگلاتی افسران کے مطابق مارا گیا بھیڑیا بالغ نر تھا۔ جانوروں کے ڈاکٹروں کی ٹیم نے اس کا پوسٹ مارٹم کیا ہے۔ افسران نے بتایا کہ یہ اس سال مارا گیا ساتواں بھیڑیا ہے۔ اب تک بھیڑیوں کے حملوں میں بارہ افراد کی موت ہو چکی ہے، جن میں زیادہ تر بچے ہیں، جبکہ 32افراد زخمی ہوئے ہیں۔
دیہات میں ہائی الرٹ، لوگوں سے محتاط رہنے کی اپیل
محکمہ جنگلات نے علاقے کے لوگوں سے مکمل احتیاط برتنے کی اپیل کی ہے۔ دیہات میں دن رات گشت کی جا رہی ہے۔ بھیڑیوں کو رہائشی علاقوں سے دور رکھنے کے لیے پٹاخے جلائے جا رہے ہیں۔ انتظامیہ نے لوگوں کو مشورہ دیا ہے کہ بچوں کو اکیلا باہر نہ بھیجیں اور ان پر خصوصی نگرانی رکھیں۔
9 ستمبر سے شروع ہوئے تھے حملے، وزیر اعلی یوگی نیلیا تھا  فضائی جائزہ 
قابل ذکر ہے کہ بہرائچ کے چند دیہات میں نو ستمبر سے بھیڑیوں کے حملے شروع ہوئے تھے۔ صورتحال کی سنگینی کو دیکھتے ہوئے ستائیس ستمبر کو وزیر اعلی یوگی آدتیہ ناتھ خود بہرائچ پہنچے تھے اور فضائی سروے کیا تھا۔ وزیر اعلی یوگی نے افسران کو ہدایت دی تھی کہ بھیڑیوں کو محفوظ طریقے سے پکڑا جائے یا ضرورت پڑنے پر مار دیا جائے۔ اس کے بعد ریاست اور دیگر ریاستوں سے ماہرین کو بلا کر خصوصی مہم شروع کی گئی، جو اس وقت جاری ہے۔