انٹرنیشنل ڈیسک: چین کے یوننان صوبے سے ایک حیران کرنے والا واقعہ سامنے آیا ہے، جس نے ثابت کر دیا کہ کبھی کبھی شادی کے لمبے عرصے بعد بھی سب سے قریبی رشتوں میں چھپے راز کتنے خطرناک ہو سکتے ہیں۔
یہ معاملہ ایک جوڑے کا ہے، جہاں شوہر نے اپنی بیوی سے ایک نہایت سنگین صحت سے متعلق حقیقت دس سال تک چھپائے رکھی۔ یہ کہانی شروع ہوتی ہے اس لال ( سرخ ) گولی سے، جو شوہر ہر رات باقاعدگی سے لیتا تھا۔ بیوی نے کئی بار پوچھنے پر شوہر سے صرف یہی سنا کہ یہ دوا جگر کی پرانی تکلیف کے لیے ہے۔ بیوی نے اس کی بات مان لی اور سوچ لیا کہ یہ ایک معمولی صحت کا مسئلہ ہے۔
وقت گزرتا گیا، لیکن حال ہی میں شوہر پر غیر قانونی جوا چلانے کے الزامات لگے اور اسے جیل بھیج دیا گیا۔ تب یہ بات سامنے آئی کہ وہ جو دوا لے رہا تھا، وہ دراصل ایچ آئی وی(ایڈز)کی دوا تھی۔ جیل انتظامیہ نے بیوی سے اس کی دوا کا انتظام کرنے کو کہا، اور اس وقت بیوی کو یقین ہوا کہ شوہر نے واقعی دس سال تک جھوٹ بول کر یہ حقیقت چھپائی تھی۔
شوہر نے تسلیم کیا کہ اسے 2011 میں ایچ آئی وی ہونے کا پتا چلا تھا اور شادی کے بعد سے اس نے یہ بات بیوی سے چھپائے رکھی۔ اس نے معافی مانگتے ہوئے یہ دلیل دی کہ وہ دوا لے کر اپنی حالت قابو میں رکھ رہا تھا۔ لیکن بیوی کے لیے یہ بات قبول کرنا آسان نہیں تھا۔
سب سے تشویش ناک بات یہ تھی کہ جوڑے نے شادی کے ابتدائی سالوں میں غیر محفوظ جنسی تعلق قائم کیے تھے، جس سے بیوی کو اپنی صحت کے حوالے سے سنگین خطرہ محسوس ہوا۔ اس نے فوراً ایچ آئی وی کا ٹیسٹ کروایا، لیکن اطمینان کی بات یہ رہی کہ اس کی رپورٹ منفی آئی۔
تاہم ذہنی اور جذباتی تکلیف نے اس کی شادی پر مستقل اثر ڈال دیا۔ اس نے اپنے شوہر کے خلاف دھوکہ دہی اور بے وفائی کے الزامات لگاتے ہوئے طلاق کی درخواست دی۔ یوننان کی عدالت نے بھی بیوی کے حق میں فیصلہ سنایا۔