انٹرنیشنل ڈیسک: لدھیانہ کے قریب ایک دکاندار پر حالیہ فائرنگ کے واقعے میں ایک بین الاقوامی گینگسٹر کا تعلق سامنے آیا ہے۔ پولیس کی تفتیش میں یہ بات سامنے آئی ہے کہ اس حملے کے پیچھے کیلیفورنیا سے تعلق رکھنے والا گینگسٹر پوتر ا سنگھ بٹالہ ہے جسے حال ہی میں ایف بی آئی نے امریکہ میں گرفتار کیا تھا۔ ایس ایس پی ڈاکٹر انکور گپتا کے مطابق ، متاثرہ جتندر سنگھ نے اپنے بیان میں بتایا کہ اس کی گرو نانک سینیٹری  اور ہارڈ ویئر کے نام سے دکان گاؤں رومی میںہے۔ 5 جولائی کو شام تقریباً 7.25 بجے وہ دکان سے اپنی گاڑی میں اپنے گاؤں چھجاوال جا رہے تھے۔ گاؤں رومی سے چھجاوال کی طرف مڑتے ہی اچانک موٹرسائیکل پر دو نوجوانوں، جن کے چہرے ڈھکے ہوئے تھے ، ا سکی گاڑی کے برابر موٹر سائیکل لگا دی ۔
موٹر سائیکل کے پیچھے بیٹھے نوجوان نے ان پر فائرنگ کر دی۔ گولی ڈرائیور کی سائیڈ کے شیشے پر لگی  ، لیکن خوش قسمتی سے جتندر سنگھ بال بال بچ گئے۔ پولیس کی تفتیش سے پتہ چلا کہ جتندر سنگھ کی بہن پرمیندر کور کو اس کے شوہر روپندر سنگھ سے طلاق ہو گئی تھی اور روپندر کو شک تھا کہ یہ طلاق جتندر سنگھ نے ہی کروائی تھی۔ اس دشمنی کی وجہ سے فائرنگ کی سازش رچی گئی۔ کیس کی تفتیش کے دوران سی آئی اے سٹاف جگراون کی ٹیم نے تقریبا 150 کلو میٹر سی سی ٹی وی فوٹیج کو سکین کیا۔ تفتیش کے دوران پولیس نانک رام اور دیپو سنگھ کو گرفتار کرنے میں کامیاب ہوگئی۔ نانک رام کی فراہم کردہ جانکاری کی بنیاد پر جرم میں استعمال ہونے والا 32 بور پستول برآمد کیا گیا۔
اسلحہ کی برآمدگی کے دوران نانک رام نے اسی پستول سے پولیس پارٹی پر دو گولیاں بھی چلائیں۔ جوابی کارروائی میں پولیس نے بھی فائرنگ کی جس سے نانک رام کی ٹانگ میں گولی لگی۔ زخمی نانک رام کو فوری طور پر ہسپتال میں داخل کرایا گیا۔ گرفتار نوجوانوں نے پوچھ گچھ کے دوران انکشاف کیا کہ اس جرم کے لیے لوپریت سنگھ نے انہیں مختلف کھاتوں کے ذریعے بیرون ملک سے تقریبا 1.5 لاکھ روپے بھیجے تھے۔ اس کے ذریعے اسلحہ اور کارتوس بھی فراہم کیے گئے۔ ایس ایس پی ڈاکٹر انکور گپتا نے بتایا کہ ملزم کو عدالت میں پیش کرکے پولیس ریمانڈ لیا جائے گا تاکہ پوری سازش کو بے نقاب کیا جاسکے۔
 غور طلب ہے کہ اس معاملے میں نامزد گینگسٹر پوتر سنگھ بٹالہ کو حال ہی میں ایف بی آئی نے امریکہ میں گرفتار کیا ہے اور وہ این آئی اے کو بھی مطلوب ہے۔ خیال کیا جا رہا ہے کہ یہ گینگ پنجاب میں فائرنگ اور بھتہ خوری کی کئی دیگر وارداتوں سے ملوث ہو سکتا ہے۔ پولیس اب بیرون ملک بیٹھے گینگسٹرز اور پنجاب میں سرگرم شارپ شوٹرز کے نیٹ ورک کی کڑیاں جوڑنے میں مصروف ہے۔