انٹر نیشنل ڈیسک :  جاپان میں سائیکل چلانا زندگی کا ایک اہم حصہ ہے۔ لاکھوں لوگ دفتر اور بازار جانے کے لیے سائیکل کا استعمال کرتے ہیں لیکن یہاں کی سڑکوں پر سائیکل چلانا کسی چیلنج سے کم نہیں ہے کیونکہ یہاں کے ٹریفک قوانین بہت سخت ہیں۔ حال ہی میں جاپان نے سائیکل کی حفاظت سے متعلق اپنے قوانین کو اور بھی سخت کر دیا ہے۔
سائیکل پر چھتری کیوں جرم ہے؟ 
 جاپان کے سڑک ٹریفک قانون کے مطابق سائیکل چلاتے وقت ایک ہاتھ میں چھتری پکڑنا غیر قانونی ہے۔ حکام کا ماننا ہے کہ چھتری پکڑنے سے ہینڈل پر قابو کم ہو جاتا ہے اور اچانک بریک لگانا مشکل ہو جاتا ہے۔ اس کے ساتھ چھتری سامنے کا منظر بھی روک دیتی ہے جس سے حادثے کا خطرہ بڑھ جاتا ہے۔ عام طور پر اس پر پانچ ہزار ین یعنی تقریباً 2800  سو روپے کا جرمانہ ہوتا ہے لیکن کچھ علاقوں میں یہ 50000  ین یعنی تقریبا 28  ہزار روپے تک ہو سکتا ہے۔

فون اور ایئر فون: موت کے دعوت 
سائیکل چلاتے وقت اسمارٹ فون کا استعمال جاپان میں ایک سنگین جرم سمجھا جاتا ہے۔ اگر آپ فون پر بات کرتے یا پیغام دیکھتے ہوئے پکڑے گئے تو آپ کو چھ ماہ کی جیل یا ایک لاکھ ین یعنی تقریباً پچپن ہزار روپے تک جرمانہ دینا پڑ سکتا ہے۔ کانوں میں آواز سننے والے آلات لگا کر گانا سننا بھی منع ہے کیونکہ اس سے ارد گرد کی گاڑیوں کی آواز سنائی نہیں دیتی۔

نشے میں سائیکل چلانے پر سخت کارروائی
 جاپان میں شراب پی کر سائیکل چلانا آپ کے لیے بڑی مشکل کھڑی کر سکتا ہے۔ نشے کی حالت میں سائیکل چلانے پر تین سال تک قید یا پانچ لاکھ ین یعنی تقریباً دو لاکھ 75  ہزار روپے تک جرمانہ ہو سکتا ہے۔ جاپانی قانون کے مطابق سائیکل کو بھی ایک گاڑی سمجھا جاتا ہے اس لیے اس پر وہی قوانین لاگو ہوتے ہیں جو گاڑیوں پر ہوتے ہیں۔