اعظم گڑھ:اعظم گڑھ کے قصبہ بلریا گنج میں شہریت (ترمیمی)قانون کے خلاف احتجاج کرنے والی خواتین پر پولیس کی بربریت کے بعد بدھ کو متاثرین سے ملنے بلریا گنج پہنچی کانگرس جنرل  سیکرٹری پرینکا گاندھی واڈرا نے کہا کہ کانگرس سی اے اے مخالف اپنا احتجاج اور تحریک کاروں کی حمایت جاری رکھے گی۔

پولیس بربریت سے متاثرہ خواتین کو دلاستہ دیتے ہوئے کانگرس لیڈر نے کہا کہ آپ لوگوں کے ساتھ زیادتی کی گئی ہے۔ہم اس ناانصافی کے خلاف ہیں۔یہ حکومت مکمل طور سے غریب مخالف ہے۔آپ کے پریشانیوں کو جاننا اور اسے ہر سطح پر حکومت کے سامنے اٹھانا ہماری ذمہ داری ہے۔محترمہ گاندھی نے ملنے والی خواتین کے ساتھ آئے بچوں کو بھی پیاردیا۔

متا ثرین سے ملاقات کے دوران پرینکا نے خواتین سے تقریباًایک گھنٹے تک بات چیت کی اور ہر ایک کی بات کو سنا۔اعظم گڑھ جاتے وقت انہوں نے راستے میں رک کر طلباء  سے بھی ملاقا ت کی اور ان کے مسائل کو جانا۔محترمہ واڈرا تقریباً 1 بجے بلریا گنج پہنچیں اور ملاقات کے مقام سے 200 میٹر پہلے ہی گاڑی سے اتر گئیں۔

تاہم تھوڑی دیر کے لئے معاملہ اس وقت الجھ گیا جب پولیس نے کانگرس لیڈران اور میڈیا اہلکار کو جائے ملاقات پر جانے کی اجازت نہیں دی۔اس موقع پر کانگرس کارکنوں نے پولیس کے خلاف نعرے بازی کی۔اس وقت پرینکا کے ساتھ یوپی کانگرس کے صدر اجے کمار للو،اجے رائے اور دیگر سینئر لیڈران موجود رہے۔