واشنگٹن: امریکہ کے صدر ڈونالڈ ٹرمپ نے کہا ہے کہ اگر سپریم کورٹ ان کی انتظامیہ کے خلاف فیصلہ دیتی ہے تو امریکہ کو عائد کیے گئے ٹیرف یعنی درآمدی محصولات کی رقم واپس کرنی پڑ سکتی ہے۔ انہوں نے تسلیم کیا کہ ایسا کرنا آسان نہیں ہوگا اور اس سے کئی لوگوں کو نقصان بھی ہو سکتا ہے۔ ٹرمپ نے کہا کہ مجھے نہیں معلوم سپریم کورٹ کیا فیصلہ دے گی۔ اب تک ہم نے ٹیرف کے ذریعے سینکڑوں ارب ڈالر کمائے ہیں۔ اگر ہم مقدمہ ہار گئے تو ہمیں پوری کوشش کرنی پڑے گی کہ وہ رقم واپس کی جائے۔ صدر ٹرمپ نے یہ بھی کہا کہ ٹیرف صرف پیسہ کمانے کا ذریعہ نہیں ہیں بلکہ اس سے امریکہ کو قومی سلامتی میں بھی بڑا فائدہ ملا ہے۔ انہوں نے کہا کہ ٹیرف کے باعث ملک کی معیشت مضبوط ہوئی ہے اور دنیا میں امریکہ کی پوزیشن بہتر ہوئی ہے۔
یہ معاملہ اس وقت امریکی سپریم کورٹ میں زیر سماعت ہے۔ اگر عدالت یہ طے کرتی ہے کہ ٹرمپ نے ہنگامی اختیارات کا غلط استعمال کرتے ہوئے ٹیرف عائد کیے تو حکومت کو اربوں ڈالر واپس کرنے پڑ سکتے ہیں۔ اسی دوران ٹرمپ اپنے 2026 کے پہلے غیر ملکی دورے پر سوئٹزرلینڈ کے داووس جا رہے ہیں جہاں وہ عالمی اقتصادی فورم میں عالمی رہنماؤں اور بڑے صنعت کاروں سے ملاقات کریں گے۔ وہاں وہ امریکہ کی تجارتی پالیسی، قومی سلامتی اور عالمی کردار پر اپنا مؤقف پیش کریں گے۔ ٹیرف، گرین لینڈ سے متعلق بیانات اور وینزویلا کے تیل سے جڑے فیصلوں کے باعث ٹرمپ پہلے ہی کئی ممالک اور اتحادیوں کے نشانے پر ہیں۔ سپریم کورٹ کا یہ فیصلہ ٹرمپ کی معاشی اور تجارتی پالیسی کے لیے نہایت اہم سمجھا جا رہا ہے۔