مظفرپور:بہار کے وزیر اعلیٰ نتیش کمار نے جمعہ کو سمردھی یاترا کے سلسلے میں مظفرپور ضلع میں 853 کروڑ روپے کی لاگت سے 172 اسکیموں کا افتتاح، سنگ بنیاد اور کام کا آغاز کیا وزیر اعلیٰ مسٹر کمار نے آج سمردھی یاترا کے تحت زرعی پیداوار مارکیٹ کمیٹی، احیاپور کے احاطے میں مظفرپور ضلع کے لیے 853 کروڑ روپے کی لاگت سے 172 اسکیموں کی ریموٹ کے ذریعے نقاب کشائی کرتے ہوئے افتتاح، سنگ بنیاد اور کام کا آغاز کیا۔ ان میں 212 کروڑ روپے کی لاگت سے 47 اسکیموں کا افتتاح، 194 کروڑ روپے کی لاگت سے 89 اسکیموں کا سنگ بنیاد اور 447 کروڑ روپے کی لاگت سے 36 اسکیموں کا کام شروع کیا جانا شامل ہے۔
مسٹر کمار نے مظفرپور ضلع میں مختلف ترقیاتی اسکیموں کا جائزہ لیا۔ جائزے کے دوران انہوں نے مظفرپور ضلع کے تحت مشہری بلاک کے چاندنی چوک (این ایچ۔28) سے برکھی پتھ (این ایچ۔57) تک سڑک کی چوڑائی اور مضبوطی کے کام کا معائنہ کیا۔ معائنہ کے دوران افسران نے وزیر اعلیٰ کو بتایا کہ اب تک 15 فیصد کام مکمل کر لیا گیا ہے۔ کام تیزی سے آگے بڑھ رہا ہے اور مقررہ مدت کے اندر اسے مکمل کر لیا جائے گا۔
اس کے علاوہ پرگتی یاترا سے متعلق اسکیموں پر بھی تیزی سے عمل درآمد کیا جا رہا ہے، جن میں مظفرپور کے مشرقی حصے میں رنگ روڈ کی تعمیر، این ایچ-122 کے تحت گوبرسہی چوک سے ماڑی پور پاور ہاوس چوک اور مظفرپور۔رام دیالو نگر کے درمیان ریلوے کراسنگ پر پہنچ روڈ سمیت آر او بی کی تعمیر، مدھول رام دیالو روڈ کی چوڑائی کا کام، سبہا چوک سے مریچا تک سڑک کی تعمیر، این ایچ-122 کے تحت چاندنی چوک سے رام دیالو نگر تک سڑک کی چوڑائی اور از سر نو ترقی کا کام، سوڈا گودام سے چندوارہ پشتہ کے درمیان اعلیٰ سطحی آر سی سی پل کے پہنچ روڈ کی تعمیر، فیز-02 کے تحت جیل چوک سے خودی رام بوس چتا استھل (650 میٹر) تک اور فیز-01 کے تحت پہلے سے تعمیر پہنچ راستے کے جنکشن سے سپاہ پور پرانا این ایچ (1450 میٹر) تک سڑک کی تعمیر، گائے گھاٹ بلاک کے بھٹگاما میں مدھرپٹی گھاٹ پر اعلیٰ سطحی پل کی تعمیر، وزیر اعلیٰ سیتو یوجنا کے تحت اورائی بلاک کے گھنشیام پور پنچایت میں مسمارا سوتی دھارا پر پل کی تعمیر، وزیر اعلیٰ سیتو یوجنا کے تحت اورائی بلاک کے بسوا گاں میں لکھن دیئی ندی پر آر سی سی پل کی تعمیر، وزیر اعلیٰ سیتو یوجنا کے تحت اورائی بلاک کے سندرکھولی گاوں میں لکھن دیئی ندی پر پل کی تعمیر اور بندرا بلاک کے تحت بڑگاوں سے شنکرپور تک سڑک کی تعمیر کا کام تیزی سے جاری ہے۔
افسران نے وزیر اعلیٰ مسٹر کمار کو بتایا کہ مظفرپور کے بیریا بس اسٹینڈ کا نام امر شہید بیکنٹھ شکلا کے نام پر رکھا جائے گا۔ اس منصوبے کا تقریباً 63 فیصد کام مکمل کر لیا گیا ہے۔ بس اسٹینڈ کا نام امر شہید بیکنٹھ شکلا کے نام پر رکھنے کے لیے محکمہ جاتی سطح پر نوٹیفکیشن بھی جاری کر دیا گیا ہے۔
وزیر اعلیٰ مسٹر کمار نے افسران کو ہدایت دی کہ ان تمام کاموں کو بہتر انداز میں اور مقررہ مدت کے اندر مکمل کیا جائے، اس بات کا خصوصی خیال رکھا جائے۔ انہوں نے مظفرپور کے احیاپور واقع زرعی پیداوار مارکیٹ کمیٹی کے احاطے میں تعمیر اور تجدیدی کام (فیز-2) کا فیتہ کاٹ کر افتتاح کیا۔ فیز-2 کے تحت مارکیٹ کمیٹی احاطہ احیاپور میں انتظامی عمارت، رجسٹریشن دفتر، کینٹین، ورکر ریسٹ شیڈ، بیت الخلا، لوڈنگ اور ویڈنگ پلیٹ فارم، تجارتی عمارت سمیت دیگر سہولیات فراہم کی گئی ہیں۔ وزیر اعلیٰ نے مارکیٹ کمیٹی احاطے میں مختلف محکموں کی جانب سے لگائے گئے اسٹالز کا بھی معائنہ کیا۔