نئی دہلی: کانگرس پارلیمانی پارٹی لیڈر سونیا گاندھی کی صدارت میں پارٹی کے پارلیمانی حکمت عملی گروپ کی اہم میٹنگ اتوار کی شام منعقد ہوئی جس میں انتخابی فہرست پر جامع نظر ثانی (ایس آئی آر)، دہلی کار دھماکہ اور دہلی میں فضائی آلودگی سمیت متعدد مسائل پر حکومت کو گھیرنے کی حکمت عملی پر تبادلہ خیال کیا گیا محترمہ سونیا گاندھی کی رہائش گاہ پر منعقدہ میٹنگ میں پارٹی کے قومی صدر ملک ارجن کھڑگے، لوک سبھا میں اپوزیشن لیڈر راہل گاندھی، پی چدمبرم، گورو گوگوئی، کے سریش، منیش تیواری، مانیکم ٹیگور، اور پرمود تیواری سمیت دیگر اہم لیڈروں نے شرکت کی۔
ذرائع کے مطابق اجلاس میں سب سے اہم ایجنڈا ایس آئی آر تھا، اور کہا گیا کہ تمام اپوزیشن جماعتیں اس معاملے پر حکومت کے خلاف پارٹی کے ساتھ کھڑی ہیں۔ اس معاملے پر حکومت کو مشترکہ طور پر کس طرح گھیرا جائے اس پر وسیع بحث ہوئی۔
اس دوران پارٹی لیڈر پرمود تیواری نے کہا کہ پارلیمنٹ میں کانگریس کی حکمت عملی کے حوالے سے اتوار کے روز میٹنگ ہوئی اور پیر کے روز صبح 10 بجے پارلیمنٹ ہاو¿س کمپلیکس میں انڈیا اتحاد کے فلور لیڈروں کی میٹنگ ہوگی، جس میں پارلیمنٹ میں اپوزیشن جماعتوں کی حکمت عملی پر غور کیا جائے گا۔
انہوں نے کہا کہ آج کی میٹنگ میں بہت سے معاملات پر بات ہوئی اور انتخابی اصلاحات پر بات کی گئی اور یہ پارلیمنٹ میں پارٹی کی اولین ترجیح ہو گی۔ انہوں نے کہا کہ دہشت گردانہ کارروائیاں چونکہ لال قلعہ تک پہنچ چکی ہیں، اس لیے غور کیا جانا چاہیے کہ ملک کا کون سا حصہ محفوظ ہے۔ اس کے علاوہ امن و امان، بے روزگاری اور مہنگائی جیسے مسائل ہیں۔