کراچی:پاکستانی ٹیم بیٹر فیوچر پاکستان نے ناروے کپ فٹبال میں انڈر 15 کا ٹائٹل جیت لیا، فائنل میں بیٹر فیوچر پاکستان نے ناروجیئن کلب کو شکست دے کر ٹائٹل اپنے نام کیا۔ ناروے کپ میں انڈر 15 ایونٹ میں شریک بیٹر فیوچر پاکستان کی ٹیم لیاری کے کھلاڑیوں پر مشتمل تھی۔بیٹر فیوچر کی ٹیم پورے ٹورنامنٹ میں ناقابلِ شکست رہی اور ہر میچ میں حریف کو آوئٹ کلاس کرتے ہوئے ٹرافی اپنے نام کی۔فائنل میں اس نے ناروے کے کلب یووک لین کو 2-0 سے شکست دی

، بیٹر فیوچر کی جانب سے دونوں ہاف میں ایک، ایک گول ہوئے، ٹیم کی جانب سے ایک گول احمد علی اور دوسرا گول اویس نے اسکور کیا۔ ناروے میں ہونے والے دنیا کے سب سے بڑے یوتھ فٹبال ٹورنامنٹ میں دنیا کے 30 سے زائد ملکوں سے سیکڑوں ٹیمیں مختلف ایج گروپس میں شریک تھیں۔