انٹرنیشنل ڈیسک: مغربی ایشیا میں جاری جنگ اور بڑھتی ہوئی کشیدگی کے درمیان متحدہ عرب امارات نے سوشل میڈیا پر پھیلائے جا رہے جعلی ویڈیوز کے خلاف سخت کارروائی کی ہے۔ حکام نے گمراہ کن اور من گھڑت ویڈیو کلپس پھیلانے کے الزام میں غیر ملکی شہریوں کو گرفتار کر لیا ہے اور ان کے خلاف فوری مقدمہ شروع کرنے کا حکم دیا ہے۔ یہ جانکاری ملک کی سرکاری خبر رساں ایجنسی کی جانب سے جاری بیان میں دی گئی۔ متحدہ عرب امارات کے اٹارنی جنرل حمد سیف الشمسی (Hamad Saif Al Shamsi)  نے کہا کہ علاقائی حالات کو دیکھتے ہوئے ڈیجیٹل پلیٹ فارموں کی مسلسل نگرانی کی جا رہی تھی۔ اسی دوران کچھ لوگوں کی طرف سے جعلی ویڈیوز اور غلط معلومات پھیلانے کی سرگرمیاں سامنے آئیں، جس کے بعد یہ کارروائی کی گئی۔
حکام کے مطابق ملزمان نے مصنوعی ذہانت( اے آئی)  سے تیار کیے گئے ویڈیوز سوشل میڈیا پر پھیلائے۔ ان ویڈیوز میں متحدہ عرب امارات کے مختلف شہروں میں بڑے دھماکے، اہم عمارتوں پر حملے اور دھوئیں سے بھری آگ جیسے مناظر دکھائے گئے۔ ان کا مقصد لوگوں کو یہ یقین دلانا تھا کہ ملک کے اندر بڑے فوجی یا دہشت گرد حملے ہو رہے ہیں۔ اٹارنی جنرل نے بتایا کہ کچھ ویڈیوز میں متحدہ عرب امارات کے فوجی ٹھکانوں کے تباہ ہونے کا دعوی بھی کیا گیا، جبکہ کچھ مناظر دراصل دوسرے ممالک کے واقعات سے متعلق تھے جنہیں متحدہ عرب امارات کا بتا کر پھیلایا گیا۔ ان کے مطابق ان ویڈیوز کا مقصد عوام کو گمراہ کرنا، خوف اور افراتفری پھیلانا اور ملک کی سلامتی اور استحکام کو کمزور کرنا تھا۔
متحدہ عرب امارات کے حکام نے ابھی تک گرفتار کیے گئے افراد کی قومیت ظاہر نہیں کی ہے۔ تاہم سرکاری وکلا ء نے ملزمان سے پوچھ گچھ شروع کر دی ہے اور اس معاملے میں قانونی کارروائی جاری ہے۔ ماہرین کا کہنا ہے کہ مغربی ایشیا میں جاری جنگ کے دوران جعلی خبریں اور مصنوعی ذہانت سے بنائے گئے ویڈیوز تیزی سے پھیل رہے ہیں، جس کے باعث حکومتیں سوشل میڈیا پر نگرانی بڑھا رہی ہیں اور سخت قوانین نافذ کر رہی ہیں۔