واشنگٹن: امریکہ کے صدر ڈونالڈ ٹرمپ کی جانب سے سابق صدر براک اوبامہ اور ان کی اہلیہ مشیل اوبامہ کو جنگل میں چمپنزی کے طور پر دکھانے والی ویڈیو کو ریپبلکن اور ڈیموکریٹ دونوں جماعتوں کی شدید تنقید کے بعد سوشل میڈیا سے ہٹا دیا گیا ہے۔ ٹرمپ نے جمعہ کو کہا کہ وہ اس پوسٹ کے لیے معافی نہیں مانگیں گے۔ انہوں نے کہا، میں نے کوئی غلطی نہیں کی۔ یہ پوسٹ جمعرات کی رات ٹرمپ کے ٹروتھ سوشل اکاؤنٹ پر شیئر کی گئی تھی۔ امریکی صدر کی سرکاری رہائش گاہ اور دفتر وائٹ ہاؤس نے بعد میں اسے ایک ملازم کی غلطی قرار دیا۔

پریس سیکریٹری کیرولین لیوٹ نے پہلے اسے ' بیکار کی ناراضگی' قرار دیا تھا، لیکن شدید دبا ؤ کے بعد پوسٹ ہٹا دی گئی۔ ویڈیو میں 2020 کے انتخابات میں ووٹنگ مشینوں میں چھیڑ چھاڑ کے جھوٹے دعوؤں کے درمیان دو چمپنزی کے چہروں پر اوبامہ جوڑے کی تصویر دکھائی گئی تھی۔ 62 سیکنڈ کی یہ ویڈیو کلپ پہلے بھی ایک انتہاپسند میم بنانے والے کی جانب سے شیئر کی جا چکی تھی۔ اس میں ٹرمپ کو جنگل کا بادشاہ دکھایا گیا اور جو بائیڈن سمیت کئی ڈیموکریٹک رہنماؤں کو جانوروں کے طور پر پیش کیا گیا ہے۔  'کانگریشنل بلیک کاکس'  کی سربراہ ایویٹ کلارک نے اسے وائٹ ہاؤس میں زہریلے اور نسل پرستانہ ماحول کا ثبوت قرار دیا۔
امریکہ کے سب سے پرانے اور بڑے شہری حقوق کے ادارے این اے اے سی پی کے صدر ڈیرک جانسن نے اسے نفرت انگیز قرار دیتے ہوئے کہا کہ ٹرمپ معاشی مسائل اور جیفری ایپسٹین معاملے سے توجہ ہٹانے کی کوشش کر رہے ہیں۔ ریپبلکن سینیٹر ٹم اسکاٹ اور راجر وکر سمیت کئی رہنماؤں نے اس پوسٹ کو ناقابل قبول قرار دیا اور معافی کا مطالبہ کیا۔ امریکہ میں سیاہ فام لوگوں کو جانوروں سے جوڑنے کی نسل پرستانہ تاریخ رہی ہے، جسے غلامی اور امتیاز کو درست ثابت کرنے کے لیے استعمال کیا جاتا تھا۔ اوبامہ پہلے بھی ایسے توہین آمیز خاکوں کا نشانہ بنتے رہے ہیں۔