انٹرنیشنل ڈیسک:  امریکہ نے ہندوستان پر عائد ٹیرف کو پچیس فیصد سے کم کر کے اٹھارہ فیصد کر دیا ہے۔ اس کا براہِ راست فائدہ ہندوستانی برآمد کنندگان اور تاجروں کو ملے گا۔ ڈونالڈ ٹرمپ نے وزیر اعظم مودی سے بات کرنے کے کچھ ہی دیر بعد ٹروتھ سوشل پر پوسٹ کر کے ہندوستان  اور امریکہ کے درمیان تجارتی معاہدے پر اتفاق ہونے کی اطلاع دی۔ انہوں نے وزیر اعظم نریندر مودی کی تعریف کی اور کہا کہ ہندوستان  اب روس سے تیل نہیں خریدے گا۔ امریکی صدر نے کہا کہ ہندوستان اب زیادہ تیل وینزویلا سے خریدے گا۔
ٹرمپ نے سوشل میڈیا پلیٹ فارم ایکس پر اپنی پوسٹ میں کہا کہ مودی نے روس سے تیل خریدنا بند کرنے اور امریکہ اور ممکنہ طور پر وینزویلا سے زیادہ تیل اور توانائی کی مصنوعات خریدنے پر رضامندی ظاہر کی ہے۔ یہ قدم یوکرین جنگ کو ختم کرنے میں مددگار ثابت ہو سکتا ہے، جہاں ہر ہفتے ہزاروں لوگوں کی جان جا رہی ہے۔

امریکی صدر نے یہ بھی دعویٰ کیا کہ دونوں ممالک کے درمیان فوری طور پر ایک تجارتی معاہدہ ہوا ہے، جس کے تحت امریکہ ہندوستان پر لگائے گئے باہمی محصولات یعنی ٹیرف کو 25  فیصد سے کم کر کے اٹھارہ فیصد کرے گا۔ اس کے ساتھ ہی ہندوستان امریکہ کے خلاف اپنے محصولات اور غیر محصولات رکاوٹوں کو صفر کرنے کی سمت میں آگے بڑھے گا۔
ٹرمپ نے اپنی پوسٹ میں یہ بھی لکھا کہ مودی نے  'بائے امریکہ ' پالیسی کے تحت امریکی مصنوعات کی خرید میں نمایاں اضافہ کرنے کا عہد کیا ہے، جس میں توانائی، ٹیکنالوجی، زراعت، کوئلہ اور دیگر مصنوعات شامل ہیں۔ انہوں نے دعوی کیا کہ ہندوستان امریکہ سے پانچ سو ارب ڈالر سے زیادہ کی مصنوعات خریدے گا۔ امریکی صدر نے مودی کی تعریف کرتے ہوئے انہیں اپنا قریبی دوست اور ہندوستان کا طاقتور اور باعزت رہنما بتایا۔ انہوں نے کہا کہ ہندوستان اور امریکہ کے تعلقات مزید مضبوط ہوں گے اور دونوں رہنما ایسے ہیں جو کام کر کے دکھاتے ہیں۔